Семён Елистратовҡа Олимпиадала бронза миҙал яулаған өсөн аҡсалата бүләк ҡаралған

ӨФӨ, 2018 йыл, 13 февраль. /«Башинформ» мәғлүмәт агентлығы, Ғәлиә Нәбиева/. Олимпия уйындарының бронза призеры Семён Елистратовҡа Башҡортостандан 500 мең һум күләмендә финанс ярҙамы ҡаралған. 2017 йылдың 11 декабрендә республика башлығы призлы урындар алған Башҡортостан спортсыларын һәм уларҙың тренерҙарын аҡсалата бүләкләү тураһында указға ҡул ҡуйғайны. 2017-2021 йылдарҙа донъя һәм Европа беренселектәрендә, кубоктарҙа, чемпионаттарҙа, Олимпия, Паралимпия, Сурдолимпия, үҫмерҙәр уйындарында бүләкләү күләме билдәләнгән, тип хәбәр иттеләр Башҡортостан Хөкүмәтенән.

Олимпия уйындарында еңгән өсөн республика спортсыға — 1,5 миллион, көмөш миҙал өсөн — 1 миллион, бронза өсөн 500 мең һум түләй.

Йәйге һәм ҡышҡы Олимпия, Паралимпия, Сурдолимпия һәм үҫмерҙәр уйындарында, донъя һәм Европа беренселектәрендә, кубоктарҙа, чемпионаттарҙа ҡатнашып, бер йәки бер нисә призлы урын яулаған спортсының тренерын спортсы алған аҡсалата ярҙам күләменән 50% күләмендә бүләкләү ҡаралған.

http://www.bashinform.ru/news/1115945-semyen-elistratov-poluchit-denezhnoe-voznagrazhdenie-za-bronzovuyu-medal-v-kopilku-olimpiyskikh-atle/