Республика көрәшселәре Саранскиҙа Рәсәй беренселегенә алты юллама яуланы

ӨФӨ, 2018 йыл, 26 ғинуар. /«Башинформ» мәғлүмәт агентлығы, Эльмира Сабирова/. 23 һәм 24 ғинуарҙа Саранскиҙа кадеттар араһында грек-рим көрәше буйынса Волга буйы федераль округы беренселеге үтте. Волга буйы федераль округының 13 төбәгенән 300-ҙән ашыу ҡатнашыусы Рәсәй беренселегенә юллама өсөн көрәште. Башҡортостандан 30-лаған спортсы булды. Уларҙың алтауһы ғына ҡаты һайлауҙы һәм көслө конкуренцияны үтә алды, тип хәбәр итте Башҡортостан Грек-рим көрәше федерацияһы матбуғат секретары Елена Ледяйкина.

Адлан Әмриев (92 кг) еңеү яуланы. Уның туғаны Алан Әмирев (71 кг) көмөш наградаға лайыҡ булды. Александр Ефимов (80 кг), Саид-Хусейн Бакаев (60 кг), Данила Назаров (60 кг) һәм Александр Чегодаев (51 кг) бронза миҙалдар яуланы.

Республиканың кадет йыйылмаһы өлкән тренеры Дамир Әхмәтйәнов һүҙҙәренсә, миҙалдар тағы ла күберәк булыр ине.

«Спортсылар яҡшы һөҙөмтә күрһәтер өсөн бөтә көстәрен һалды. Кемгәлер физик әҙерлек етмәне, кемдер психологик яҡтан ҡаушап ҡалды. Артабан да эшләйәсәкбеҙ һәм оҫталыҡты нығытасаҡбыҙ», — тип билдәләне өлкән тренер.

8-11 февралдә республиканан алты еңеүсе һәм призер Ингушетияға ил беренселегенә юллана.

http://www.bashinform.ru/news/1108727-bortsy-bashkirii-zavoevali-shest-putevok-na-pervenstvo-rossii-v-saranske-/