«Йәшел дерби», икенсе бүлек: «Салауат Юлаев» Ҡазандың «Аҡ Барыҫ»ын «ҡороға» еңде

, 2017 йыл, 30 ноябрь. /«Башинформ» мәғлүмәт агентлығы, Наталья Овчарук/. Өфө һәм Ҡазан көйәрмәндәре өсөн ысын байрам: бер аҙна эсендә икенсе «йәшел дерби». 22 ноябрҙә «Салауат Юлаев» Өфө боҙонда «Аҡ Барыҫ»ты ҡабул итте һәм был осрашыуҙа 0:5 иҫәбе менән еңелде. 29 ноябрҙә Башҡортостан һәм Татарстан баш ҡалаларының ҡара-ҡаршы торошо «Татнефть-Арена»һына күсте. 8890 тамашасы «йәшел дербиҙең» икенсе бүлеген ҡарарға йыйылды.

Континенталь хоккей лигаһында приниципаль осрашыуҙарҙың береһе мәрәйһеҙ осорҙан башланп китте: ярышташтар бер-береһен иғтибар менән күҙәткән төҫлө тойолдо. Баш арбитр «Салауат Юлаев» һәм «Аҡ Барыҫ» башҡарыуында ике уйынсыны алыҫлаштырып торҙо.

Уйын ваҡытының икенсе өлөшө Башҡортостандың баш ҡалаһынан килгән ҡунаҡтар өсөн бәхетле булды. Өсөнсө минутта уҡ Федор Беляков һәм Энвер Лисин уңыш мөмкинлеген күреп, шайбаны Антон Бурдасовҡа ебәрҙе, ул Ҡазан ҡапҡаһын асты – 0:1. Осор аҙағында «юлаевсылар» хәүефле мәл кисерҙе: өсәүләшеп бишәүгә ҡаршы торҙо, әммә ҡапҡаны бирмәне.

Өсөнсө осор «Салауат» яҡлы булды. Өфө хоккейсылары ҡапҡаларын ныҡ һаҡланы һәм икенсе «йәшел дербиҙа» минималь иҫәп менән еңеү яуланы.

«Салауат Юлаев» киләһе уйынды үҙ боҙонда Минскиҙың «Динамо»һы менән үткәрә.