Башҡортостан спортсыһы Илвир Хужин Олимпия уйындарында ҡатнашыуҙан ғүмерлеккә ситләтелде

ӨФӨ, 2017 йыл, 30 ноябрь. /«Башинформ» мәғлүмәт агентлығы, Әлфиә Әғлиуллина/. Шаршамбы Халыҡ-ара олимпия комитеты Рәсәй бобслейсылары Александр Касьянов, Алексей Пушкарев һәм Илвир Хужин Олимпия уйындарында ҡатнашыуҙан ғүмерлеккә ситләтелде, ә уларҙың Сочиҙағы Уйындарҙа өлгәшкән һөҙөмтәләре юҡҡа сығарылды. Һуңғараҡ Халыҡ-ара бобслей һәм скелетон федерацияһы (IBSF) өсәүһен дә үҙ ярыштарынан ситләтте, тип хәбәр итә «РИА Яңылыҡтар».

«Киләһе аҙнала Германияла Донъя кубогы, шуға беҙ килдек, әҙерләнәбеҙ, әммә бындай шарттар, беренсенән, кәйефте боҙа, әлеге мәлдә нимә эшләргә лә белмәйем. Ни булһа ла әҙерләнәбеҙ, барыһы ла халыҡ-ара федерация ҡарарынан тора», — тип һөйләне Илвир Хужин «РИА Яңылыҡтар»ға.

Алдан Халыҡ-ара олимпия комитеты 2014 йылғы Олимпия уйындарында Рәсәй йыйылмаһы яулаған 10 миҙалды тартып алды. Уларҙың дүртәүһе саңғы ярыштарында: марафонда Александр Легковта алтын, 4 һәм 10 саҡрым оҙонлоҡтағы эстафетала Рәсәйҙең ир-егеттәр йыйылмаһында көмөш, шулай уҡ Максим Вылегжанинда (марафон һәм команда спринты) ике көмөш награда; бобслейсы Александр Зубковта ике алтын, скелетонда Александр Третьяковта – алтын һәм Елена Никитинала – бронза, шулай уҡ биатлонда ике көмөш миҙал – эстафетала ҡатын-ҡыҙҙар йыйылмаһында һәм спринтта Ольга Вилухинала.