Халыҡ-ара олимпия комитеты биатлонсы Ольга Вилухинаны олимпия наградаларынан мәхрүм итте

ӨФӨ, 2017 йыл, 28 ноябрь. /«Башинформ» мәғлүмәт агентлығы, Наталья Овчарук/. Халыҡ-ара олимпия комитеты сираттағы ултырышында тағы биш Рәсәй спортсыһын миҙалдарҙан мәхрүм итте. Улар араһында Башҡортостандың Межгорье ҡалаһынан Ольга Вилухина ла бар.

«Ул саҡта бәхет йәштәре ине, хәҙер иһә киреһенсә! Ниндәй ғәҙелһеҙлек! Дуҫтар, һеҙ ниндәйҙер ҡот осҡос конвейер эшләүен аңламанығыҙмы ни? Беҙҙең барыбыҙҙы ла миҙалдарҙан мәхрүм итәләр. Бының һәйбәт тамамланырына өмөт юҡ. Минең миҙалдарым таҙа. 15 йыл эсендә алынған йөҙҙәрсә пробаларымдың бөтәһе лә кире. Мин Сочиҙа бәхетле инем, көйәрмәндәргә һәм илгә бүләк иткән хис-тойғоларҙы, шатлыҡты юҡҡа сығарып булмай. Мин аҙағынаса көрәшәсәкмен!» — тип яҙҙы Ольга Вилухина «Инстаграм»да.

Иҫегеҙгә төшөрәбеҙ, 2014 йылда Сочиҙағы Олимпиадала Башҡортостан биатлонсыһы ике көмөш миҙал яуланы: тәүгеһен – Зайцева һәм Шумилова менән эстафетала, икенсеһен – спринтта. Хәҙер награда – Норвегия спортсыларына, ә спринт өсөн «көмөш» Украина вәкиле Вита Семеренкоға күсә.

2016 йылда Ольга Вилухина спорт карьераһын тамамланы.