Өфө «Толпар»ы хоккейсыһын Рәсәйҙең йәштәр йыйылмаһына саҡырғандар

ӨФӨ, 2017 йыл, 6 октябрь. /«Башинформ» мәғлүмәт агентлығы, Наталья Овчарук/. Мәскәү эргәһендәге Новогорскиҙа 18 йәшкә тиклемге йәш хоккейсылар йәштәр йыйылмаһының баш тренеры Александр Зыбин етәкселегендә уҡыу-күнәкмә йыйынын башланы. Ҡатнашыусылар араһында Өфөнөң «Толпар» йәштәр клубы уйынсыһы, һөжүм итеүсе Алексей Пустозеров бар. Тренерҙар штабы бөтә илдән йәмғеһе 28 уйынсыны: өс ҡапҡасыны, 10 һаҡсыны һәм 15 һөжүм итеүсене саҡырған.

«Толпар»ҙың матбуғат хеҙмәтендә аңлатыуҙарында, Пустозеровтың карьераһында был милли йыйылмаға тәүге саҡырыу. Алексей башҡа йәш хоккейсылар менән бергә 11 октябргә тиклем «Новогорск» базаһында күнекмәләр уҙғара. Унан һуң йыйылма Чехияға юлланасаҡ, унда ул өс дуҫтарса уйын уҙғарасаҡ. Ваҡыты билдәле: 13, 14 һәм 15 октябрь.