Тимур Сафин Сочиҙа Бөтә Рәсәй спорт ярыштарында алтын миҙал яуланы

ӨФӨ, 2017 йыл, 3 октябрь. /«Башинформ» мәғлүмәт агентлығы, Наталья Овчарук/. Өфөләге фехтование мәктәбе тәрбиәләнеүсеһе, Рио-де-Жанейролағы Олимпиаданың бронза призеры Тимур Сафин яңы үрҙәр яулай. 30 сентябрҙә ул Сочиҙа Бөтә Рәсәй спорт ярыштарында дәғүәсеһен 15:14 иҫәбе менән еңеп, алтын миҙалға лайыҡ булды. Әйткәндәй, финалда олимпия уйындарында ҡатнашыусы менән уның яҡташы һәм аҙашы Тимур Арыҫланов көс һынашты. Икенсе яҡташыбыҙ иһә көмөш миҙал яуланы.

Башҡортостандан тағы бер спортсы Искәндәр Әхмәтов та ярымфиналға тиклем барып етте, ул турнирҙы дүртенсе урында тамамланы, тип хәбәр иттеләр Рәсәй Фехтование федерацияһының матбуғат хеҙмәтенән.

Ҡыҙҙар араһында еңеүселәр рәтендә Башҡортостан спортсылары ла бар. 27 йәшлек Анастасия Иванова көмөш миҙал менән бүләкләнде. Аделина Заһиҙуллина Курск спортсыһы Юлия Бирюкова менән өсөнсө урынды бүлеште.