Башҡортостандан бейеклеккә һикереүсе Данил Лысенкоға Рәсәй Хөкүмәте рәхмәт белдерҙе

ӨФӨ, 2017 йыл, 3 октябрь. /«Башинформ» мәғлүмәт агентлығы, Гөлфиә Акулова/. Рәсәй Федерацияһы Хөкүмәте 2017 йылда Лондонда донъя чемпионатында сығыш яһаған өсөн Рәсәйҙең бер төркөм еңел атлетсыларына рәхмәт белдерҙе, тип хәбәр ителә рәсми хоҡуҡи мәғлүмәт интернет-порталында. Улар иҫәбендә бейеклеккә һикереүсе Мария Ласицкене, оҙонлоҡҡа һикереүсе Дарья Клишина. Шулай уҡ Лондондағы турнирҙа юғары спорт ҡаҙаныштары өсөн йәйәү йөрөүсе Сергей Широбоковҡа, йүгереүсе Сергей Шубенковҡа, сүкеш ырғытыусы Валерий Прокинға һәм башҡорт спорты тәрбиәләнеүсеһе, бейеклеккә һикереүсе Данил Лысенкоға рәхмәт һүҙҙәре белдерелде.

Лондонда донъя чемпионаты 4-13 августа үтте. Бөтә Рәсәй еңел атлетика федерацияһын ситләтеү сәбәпле Рәсәй спортсылары ярыштарҙа нейтраль статус аҫтында сығыш яһаны һәм бер алтын, биш көмөш миҙал яуланы. Ласицкене – донъя чемпионы, Клишина, Широбоков, Шубенков, Лысенко һәм Пронкин көмөш призерҙар булды.