Республика вәкилдәре халыҡ-ара шашка буйынса Европа чемпионатында Рәсәй йыйылмаһы өсөн алтын һәм бронза яуланы

ӨФӨ, 2017 йыл, 21 сентябрь. /«Башинформ» мәғлүмәт агентлығы, Әлим Фәйезов/. Литваның Вильнюс ҡалаһында халыҡ-ара шашка буйынса Европа команда чемпионаты бара, унда Рәсәй йыйылмаһы тулыһынса Башҡортостан вәкилдәренән – «Башнефть» профессиональ клубы спортсыларынан төҙөлгән. Ир-егеттәр өсөн беренсе таҡтала – Александр Георгиев, икенселә – Айнур Шәйбәков һәм өсөнсөлә Муродулло Амриллаев сығыш яһай. Ҡатын-ҡыҙҙарҙа – команда капитаны Айгөл Иҙрисова һәм икенсе таҡтала Әлиә Әминова. Уҙған көндәрҙә тиҙ программа – рапидала миҙалдар отолдо. Рәсәйҙең ир-егеттәр йыйылмаһында алтын, ҡатын-ҡыҙҙарҙа – бронза. Бик яҡшы команда тактикаһы ир-егеттәргә алтын килтерҙе: Муродулло Амриллаев өсөнсө таҡтала уйнаны һәм командаға «алтын» мәрәйҙәр килтерҙе. Һөҙөмтәлә ете партияла уның 14 мөмкин мәрәйҙән 13 – алты еңеү һәм бер тигеҙ иҫәп.

Ярыштар 23 сентябргә ҡәҙәр дауам итә, был көндө классик программала еңеүселәр билдәләнәсәк, тип хәбәр иттеләр «Башнефть» ойошмаһы профессиональ шашка клубының матбуғат хеҙмәтендә.