Ғәлим Яҡупов яңы командала Екатеринбург спортын яҡтыртасаҡ

ӨФӨ, 2017 йыл, 14 июль. /«Башинформ» мәғлүмәт агентлығы, Дмитрий Слезин/. «Башҡортостан» ТРК ДУП-ның элекке директоры Ғәлим Яҡупов — «Матч ТВ» федераль спорт телеканалының Екатеринбургтағы филиалы етәксеһе. Ул үҙенең яңы эш урыны хаҡындағы мәғлүмәтте «Башинформ» агентлығына телефондан һөйләшеүҙә раҫланы.

2017 йылдың март башында Ғәлим Яҡупов Башҡортостандың Матбуғат һәм киң мәғлүмәт саралары агентлығы етәксеһе урынбаҫары итеп тәғәйенләнде һәм республикала электрон киң мәғлүмәтте үҫтереү мәсьәләләре өсөн яуаплы булды.

«Мине Екатеринбургка саҡырғас, ризалаштым. Шатмын, әлбиттә, барыһы ла килеп сығыр, тип ышанам, — тип тәьҫораттары менән бүлеште медиа-менеджер. — Ҡала ҙур, миңә бик оҡшай. Эшләргә тура киләсәк профессионалдар командаһы ла оҡшай. Улар Универсиадала, Олимпиадала, башҡа спорт турнирҙарында, шулай уҡ Рәсәйҙәге ҙур Екатеринбург-Экспо күргәҙмәһендә эшләү тәжрибәһенә эйә. Футбол, хоккей һәм башҡаларҙы яҡтыртасаҡбыҙ — бында ла спортты бик яраталар. Бындай эш минең өсөн — адреналин, тура трансляциялар...».