Николай Красников - «Спорт» класлы ҡаргиҙәрҙә Рәсәйҙең иң яҡшы уҙышсыһы

ӨФӨ, 2017 йыл, 10 апрель. /«Башинформ» мәғлүмәт агентлығы, Николай Ермоленко/. Боҙҙа мотоуҙыш буйынса 2017 йылғы Европа чемпионы, боҙҙағы спидвей буйынса донъяның иң билдәле спортсыһы, Өфөнән Николай Красников үҙенең наградалар коллекцияһын тағы ла бер спорт төрөндә – ҡаргиҙәрҙәге кроста тулыландырҙы. Ул икенсе тапҡыр Рәсәй Мотоуҙыш федерацияһы чемпионы булды – ил чемпионы «Спорт» класында ошо исемгә эйә.

Февралдә Әлмәт ҡалаһында башланған һәм апрель башында Яңы Уренгойҙа тамамланған дүрт этаплы ярышта Ғ. Ҡадиров исемендәге Техник спорт төрҙәре үҙәге уҙышсыһы ете ярыштың дүртәүһен еңеп, 166 мәрәй йыйҙы. Икенсе урын яулаусы Яңы Уренгойҙан Никита Богомолов чемпиондан 30 мәрәйгә ҡалыша. Бронза призер – Төмәндән Николай Грачев – Красниковты өс тапҡыр уҙған берҙән-бер ҡатнашыусы. Әммә ике этапта йәки дүрт уҙышта ҡатнашмағаны өсөн ул үҙ иҫәбенә 75 мәрәй генә яҙа алды.

Иҫегеҙгә төшөрәбеҙ, ике йыл элек Николай Красников, ҡаргиҙәр спортында сығыш яһап, Рәсәй Мотоуҙыш федерацияһы чемпионы булды һәм Кубок яуланы. Үткән миҙгелде ул ҡалдырҙы, ә быйылғыһында боҙҙа мотоуҙыш буйынса Европа чемпионатында ҡатнашыу сәбәпле Кубокта ҡатнашманы.