Өфөнән Антон Бабиков биатлон буйынса Рәсәй чемпионатында өсөнсө булды

ӨФӨ, 2017 йыл, 27 март. /«Башинформ» мәғлүмәт агентлығы, Әлфиә Әғлиуллина/. Өфө спортсыһы Антон Бабиков биатлон буйынса Рәсәй чемпионатында эҙәрлекләү ярышында бронза миҙал яуланы. I Бөтә Рәсәй көслө спортсылар спартакиадаһы сиктәрендә ошо көндәрҙә Төмән өлкәһендә ил беренселеге бара.

Төмән биатлонсыһы Евгений Гараничев финишҡа тәүгеләрҙән булып килде. Көмөш миҙалды Семен Сучилов яуланы.

«Ослола рәттән өс ярыштан һәм ауыр күсенеүҙән һуң, спринтҡа әҙерләнеп өлгөрмәнем. Был, әлбиттә, атыуҙа ла сағылыш тапты. Үҙемдең хәлем яҡшы, ләкин саңғыларым ауырыраҡ барҙы. Семен Сучилов менән көрәшеүе ҡыйыныраҡ булырын аңлай инем. Шуға ҡарамаҫтан, мин ҡәнәғәтмен, ярышырға көсөм бар. Эҙәрлекләү ярыштары бигерәк тә ҡыҙыҡ. Спринтта мин идеаль түгелмен һәм эҙәрлекләүҙә тәүге позицияларҙан старт алам, шуға күрә һәр саҡ ҡыуып етергә тура килә», — тип спортсының һүҙҙәрен килтерә Рәсәй Биатлонсылар союзы сайты.