Төбәктең йәш көрәшселәре грек-рим көрәше буйынса Волга буйы федераль округы беренселегендә һигеҙ миҙал яуланы

ӨФӨ, 2017 йыл, 21 март. /«Башинформ» мәғлүмәт агентлығы, Эльмира Сабирова/. Волга буйы федераль округындағы иң көслө көрәшселәр Октябрьскийға грек-рим көрәше буйынса округ беренселегенә йыйылды. Ярыштарҙа 2000-2001 йылғы үҫмерҙәр ҡатнашты.

Ил беренселегенә юлламалар өсөн Башҡортостандан, Татарстандан, Удмуртиянан, Түбәнге Новгородтан, Ульяновск өлкәһенән һәм Волга буйы федераль округының башҡа төбәктәренән 300-гә яҡын спортсы көс һынашты.

Республика исеменән 61 спортсы сығыш яһаны. Ләкин һигеҙ йәш спортсы ғына ил беренселегенә юллама отто. Арсанали Тонаев (85 килограмм) һәм Адлан Амриев (100 килограмм) алтын миҙал яуланы. Руслан Садиҡов (73 килограмм) һәм Владислав Пантелеев (120 килограмм) көмөш миҙал алды. Филимон Березовский (50 килограмм), Владислав Карасев (58 килограмм), Андрей Иванов (76 килограмм) һәм Никита Денисов (120 килограмм) өсөнсө урынға лайыҡ булды.

Волга буйы федераль округы беренселеге еңеүселәре Арсанали Тонаев һәм Адлан Амриев йәй көнө Дондағы Ростов ҡалаһында Рәсәй уҡыусылары спартакиадаһында ҡатнаша, тип хәбәр итте «Башинформ» агентлығына Башҡортостан Грек-рим көрәше федерацияһының матбуғат секретары Елена Ледяйкина.