«Өфө-Арена»лағы 12 йәшерен урынды нисек күрергә?

ӨФӨ, 2017 йыл, 22 февраль. /«Башинформ» мәғлүмәт агентлығы, Әлим Фәйезов/. Шаршамбы, 22 февралдә, Өфөнөң «Салауат Юлаев» хоккей клубы өсөн Континенталь хоккей лигаһы чемпионатының иң ҡыҙыу мәле — плей-офф башлана. «Башинформ» агентлығы хәбәр иткәнсә, беҙҙе шунда уҡ «йәшел ярыш» көтә. Конференцияның сирек финалы дәғүәсеһе — Ҡазандың «Аҡ Барыҫ» командаһы.

Быйылғы миҙгелдә өфөләр ҡазандарҙы өс тапҡыр еңде лә инде. Тәүге тапҡыр — ноябрҙә, үҙ боҙонда, 4:2 иҫәбе менән. Ул саҡта «юлаевсылар» ҡунаҡтарҙың һөжүмсеһе Иржи Секач уйын аҙағына тиклем сығарылғандан һуң дәғүәсеһенең ҡапҡаһына ике шайба индерҙе. Икенсе һәм өсөнсө тапҡыр командалар Ҡазанда осрашты. 5 февралдә, Линус Умарктың буллит һуғыуы арҡаһында, еңеү йәнә Өфөгә эләкте, өсөнсө осрашыу ҡазандар файҙаһына тамамланды — 6:5, овертаймда команда финал голын индерҙе.

«Йәшел ярыш»тың мөһим уйыны 14 февралдә Өфөлә уҙҙы. Өфөләр ҡазандарҙы 3:1 иҫәбе менән еңде һәм чемпионаттың финал өлөшөнә сығыу мөмкинлеген алды.

Плей-офф башланыуға «Башинформ» мәғлүмәт агентлығының яңы махсус проектын — «Өфө-Арена»лағы йәшерен урындарҙың фоторепортажын тәҡдим итәбеҙ. Был урындарға сит кешеләрҙе үткәрмәйҙәр һәм телевизорҙан күрһәтмәйҙәр тиерлек.

«Өфө-Арена»лағы 12 йәшерен урын» мәҡәләһен һәм эксклюзив фотоларҙы «Лонгридтар» бүлегендә ҡарарға мөмкин.