«Салауат Юлаев» көйәрмәндәре ғинуарҙа уңышһыҙ сығыш яһауға бәйле команданан аңлатма биреүҙе талап итте

ӨФӨ, 2017 йыл, 30 ғинуар. /«Башинформ» мәғлүмәт агентлығы, Дмитрий Слезин/. Кисә «Салауат Юлаев» көйәрмәндәре яратҡан командаһының сираттағы еңелеүенән һуң команданы аэропортта ҡаршы алды һәм һөйләшеүгә саҡырҙы, тип хәбәр итә «Башҡортостан» дәүләт телерадиокомпанияһы. Улар команданың ғинуар айында көсһөҙ сығыш яһауына аңлатма биреүҙе талап итте, шуның һөҙөмтәһендә ул һигеҙенсе урынға төштө һәм плей-офҡа эләкмәүе ихтимал. Туғыҙ йыл эсендә тәүге тапҡыр өфөләргә Континенталь хоккей лигаһы чемпионатын беренсе этапта уҡ тамамлау хәүефе янай.

Фанаттар менән һөйләшеүгә баш тренер Игорь Захаркин менән бергә бөтә уйынсылар ҙа сыҡты.

«Салауат»тың капитаны Игорь Григоренко әйтеүенсә, «егеттәр бар көсөн һалып уйнай, әммә һәр ваҡыт уңышҡа ирешеп булмай».

Захаркин команда аҙағынаса көрәшәсәк тип вәғәҙә бирҙе. Бер аҙнанан йәрәхәтләнгән ике уйынсы сафҡа баҫа, әммә әлеге хәл бик ҡырҡыу, тип билдәләне ул.

Тиҙҙән «Салауат Юлаев» үҙ майҙанында СКА (Санкт-Петербург), ЦСКА (Мәскәү), «Аҡ Барыҫ» (Ҡазан) һәм «Лада» (Тольятти) командаларына ҡаршы уйнай. Унда һигеҙ команда иҫәбенән төшөп ҡалмаҫ өсөн бик күп мәрәй йыйырға кәрәк.