«Морат» комплексы Көньяҡ Уралда иң яҡшы тау саңғыһы курорты булырға тейеш – Рөстәм Хәмитов

ӨФӨ, 2017 йыл, 16 ғинуар. /«Башинформ» мәғлүмәт агентлығы, Александр Смирнов/. 13 ғинуарҙа Башҡортостан Башлығы Рөстәм Хәмитов Белорет районына эш сәфәре барышында «Морат» тау саңғыһы үҙәгендә булды, унда шәхсән үҙе трассаларҙы һынаны, туристар өсөн булдырылған шарттар менән танышты, комплексты үҫтереү мәсьәләләре буйынса кәңәшмә үткәрҙе.

Тау саңғыһы үҙәге етәкселеге һүҙҙәренсә, Яңы йыл байрамдарында бында 8,5 меңдән ашыу кеше ял иткән, был үткән йылдағы күрһәткестәрҙән 11 процентҡа күберәк.

– Мин Яңы йылды ҡаршыларға килгән кешеләр менән аралаштым, – тине төбәк етәксеһе. – Тау битләүҙәре һәйбәт, тәбиғәт иҫ киткес матур. Әммә кешеләрҙе күтәргес, үткәргес системаһы хөрт: сираттар, һыуыҡта кешеләрҙе 15 минут өҫкә күтәрәһегеҙ. Йәғни канат юлының насар эшләүе Белорет тураһында барлыҡ ыңғай тәьҫораттарҙы юҡҡа сығара.

Республика Башлығы парковканы ойоштороуҙың ҡәнәғәтләнерлек булмауын, сервистың түбән кимәлен дә билдәләне.

– Тау битләүҙәре буйынса дәғүәләр юҡ: улар киң, уңайлы. Беҙҙә нигеҙ бар. Бында 10 процентты тамамларға ҡалған, ә һеҙ ниндәйҙер ысулдар менән ошо хәлдән сығырға теләйһегеҙ. Улай килеп сыҡмаясаҡ. Профессиональ яҡтан ҡарарға кәрәк, – тине Рөстәм Хәмитов. – Төҙөлөп бөтөргә тейешле канат юлдары бар. Бында һигеҙ түгел, 15 мең кеше ял итһен ине. Машина ҡуйыу, туҡланыу урындары булһын, барыһы ла яҡшы ойошторолһон. «Морат» комплексы Көньяҡ Уралда иң яҡшы тау саңғыһы курорты булырға тейеш.

Рөстәм Хәмитов, кәрәкле ресурстарҙы күрһәтеп, тау саңғыһы комплексының артабанғы эш планын әҙерләргә, подрядсыларҙы һәм ситтән белгестәр йәлеп итеп, ҡыҫҡа ваҡыт эсендә асыҡланған етешһеҙлектәрҙе бөтөрөргә ҡушты.