Башҡортостанда һайлау көндәрендә «Рәхмәт» акцияһы үткәрелә

Берҙәм тауыш биреү көнөндә — 18-20 сентябрҙә — Башҡортостанда «Рәхмәт» акцияһы үткәрелә. Был юлы ташламалар ғына була: бер ниндәй ҙә бүләктәр уйнатылмай. Акцияны ойоштороусылар «Башинформ» агентлығында уҙған матбуғат конференцияһында тулыраҡ мәғлүмәт бирҙе.

«2026 йылда «Рәхмәт» акцияһы — ул тәү сиратта ташламалы акция, партнерҙарыбыҙҙан ташламалар алыу мөмкинлеге, — тип һыҙыҡ өҫтөнә алды «Алға-Патриот» спорт-патриотик үҙәге директоры Ринат Хәбиров. — Был инде ике меңенсе йылдарҙан башланған күп йыллыҡ тарих. Ошо йәмәғәт башланғысын ойоштороу беҙҙең өсөн бик мөһим, сөнки ул кешеләр өсөн эшләнә. Халыҡ әүҙем ҡатнаша, уларға оҡшай: участкаға киләһең, тауыш биреп сығаһың һәм купон алаһың. Элек беләҙектәр булһа, хәҙер бына шундай ике яҡлы купон. Ул республика биләмәһендәге меңдән ашыу партнерҙарыбыҙҙан ташламалар алырға мөмкинлек бирә. Бөтә муниципалитеттар: 54 район һәм 9 ҡала округы ҡушылды».

Ул шулай уҡ әлеге ҡатмралы шарттарҙа эшләгән бизнесҡа рәхмәт белдерҙе.

Башҡортостан сауҙа ассоциацияһы вәкиле Тимур Ниғмәтуллин һүҙҙәренсә, акцияға меңдән ашыу нөктә һәм алты йөҙҙән күберәк эшҡыуар ҡушылған. Партнерҙар араһында аҙыҡ-түлек магазиндары, кафе һәм ресторандар, балалар үҙәктәре, фитнес-клубтар, автосалондар, бөҙрәханалар бар.

«Кемдер бер сынаяҡ ҡәһүәгә, кемдер маникюр курсына ташлама яһай. Ташламалар  50% тиклем етә,  — тине спикер. — Тулы исемлек рахмат2026.рф сайтында бар».

Бүләктәр уйнатылмай – ташламалар ғына

Уҙған йылдарҙан айырмалы рәүештә, быйыл акцияла бүләктәр уйнатылмай, ташламалар ғына була.

Купонды күп тапҡыр ҡулланырға мөмкин, теркәргә кәрәкмәй. Унда акцияның сайтына күсеү өсөн QR-код урынлаштырылған, сайтта партнерҙарҙың тулы исемлеге һәм акцияның шарттары менән танышырға мөмкин.

«Теркәлеү, мәғлүмәттәр ҡалдырыу талап ителмәй. Телефон ярҙамында QR-кодты асып, инеү мөмкинлеге алаһығыҙ. Бер ҡайҙа ла исем-шәрифте, паспорт мәғлүмәттәрен, телефон номерын яҙырға кәрәкмәй», — тип яуапланы  Ринат Хәбиров хәүефһеҙлек тураһында һорауға.

Ул мутлашыусылар тураһында ла иҫкәртте: «Әгәр һеҙгә кемдер шылтыратып, үҙен акцияны ойоштороусы тип таныштырһа, ниндәйҙер мәғлүмәттәр, СМС-кодтар һораһа, бер нәмә лә әйтмәгеҙ».

Ойоштороусылар әйтеүенсә, әгәр купонды алмаһалар, уны ҡабаттан ҡулланырға мөмкин. QR-код – сайтҡа күсеү генә. Ташлама ошо ҡағыҙ купонды күрһәткән осраҡта бирелә», — тип аңлатты Ринат Хәбиров.

Ирекмәндәр ярҙамға килә

18, 19 һәм 20 сентябрҙә ирекмәндәр һайлау участкаларында купондар тарата. «Башлыса йәштәр, студенттар әүҙем ҡушыла», — тине Тимур Ниғмәтуллин.

Оло йәштәгеләр ҙә иғтибарҙан ситтә ҡалмай. Ойоштороусылар әйтеүенсә, купондар күп, бөтәһенә лә етерлек.

«Байрам» магазиндар селтәре вәкиле Эльвира Вәлиева кһүҙҙәренсә, купондарҙың ғәмәлдә булыу ваҡыты — 18 сентябрҙән 20 сентябргә тиклем.