Оксана Лут һәм Радий Хәбиров Башҡортостандың иң яҡшы аграрийҙарын бүләкләне

26 августа Республика менән идара итеү үҙәгендә эш сәфәре менән Өфөгә килгән Рәсәйҙең ауыл хужалығы министры Оксана Лут һәм Башҡортостан Башлығы Радий Хәбиров агросәнәғәт комплексы системаһындағы күп йыллыҡ намыҫлы хеҙмәте өсөн төбәктең ауыл хужалығы һәм аҙыҡ-түлек сәнәғәте хеҙмәткәрҙәренә дәүләт һәм ведомство наградалары тапшырҙы.

– Башҡортостанға даими киләм. Был иҡтисадтың төрлө тармаҡтары, шул иҫәптән ауыл хужалығы үҫешкән бик күп планлы төбәк. Республика йыл һайын ауыл хужалығы продукцияһын етештереү күләме буйынса үҫә. Уҙған йыл бында рекорд теркәлде – Башҡортостан 1 миллион тонна майлы һәм 3,6 миллион тонна иген культуралары йыйып алды. Малсылыҡ тармағында, һөт, ит етештереү күләме буйынса даими үҫеш күҙәтелә. Рәсәйҙең иң яҡшы аграр университеттарының береһе лә Башҡортостанда урынлашҡан. Юғары уҡыу йорто әүҙем үҫешә, барлыҡ программаларҙа ҡатнаша, бөгөн бөтә илдә билдәле, – тине Оксана Лут. – Бөгөн беҙ республикала булған барлыҡ йүнәлештәр – малсылыҡты, үҫемлекселекте, ветеринарияны, фәнни-белем биреү эшмәкәрлеге – вәкилдәрен бүләкләйбеҙ. Хеҙмәтегеҙ өсөн ҙур рәхмәт! Һеҙҙең һәм һеҙ эшләгән компаниялар ярҙамында граждандарыбыҙ тәмле туҡлана ала һәм көн һайын күп илдәрҙә булмаған бай ассортименттан һайлай ала. Башҡортостан продукцияһын, башҡорт брендтарын тотош Рәсәй белә. Республикала ауыл хужалығы артабан да уңышлы үҫешер тип ышанам.

– Оксана Николаевна – республикабыҙҙың яҡын дуҫы. Һәм мин шәхсән һеҙгә һәм Ауыл хужалығы министрлығына даими ярҙамығыҙ өсөн ҙур рәхмәт әйтергә теләйем, – тине Радий Хәбиров. – Бөгөн беҙ агросәнәғәт комплексы хеҙмәтсәндәренә, аҙыҡ-түлек хәүефһеҙлеген тәьмин итеүселәргә, ауылды республикабыҙҙың, мәҙәниәтебеҙҙең һәм әхлағыбыҙҙың терәге итеп һаҡлаусыларға дәүләт наградалары тапшырабыҙ. Ауыр хеҙмәтегеҙ өсөн ихлас рәхмәтемде белдерәм. Ә республика артабан да ауылды үҫтереүгә – юлдар төҙөүгә һәм ремонтлауға, парктарҙы һәм скверҙарҙы төҙөкләндереүгә, социаль инфраструктураны нығытыуға – ресурстар йүнәлтәсәк.