Өфөнән Белоретҡа поезд менән дүрт сәғәттә барып етергә мөмкин

Өфөнән Белоретҡа поезд менән дүрт сәғәттә барып етергә мөмкин. Республика хөкүмәтенең оператив кәңәшмәһендә Куйбышев тимер юлы начальнигы урынбаҫары Дмитрий Новиков ошо турала һөйләне.

Апрелдә Башҡортостанға ике системалы ике «Финист» электр поезы килә. Республика Башлығы Радий Хәбировтың ҡушыуы буйынса тиҙ йөрөшлө электричкалар Өфө – Белорет маршрутына тәғәйенләнә. Шулай итеп, таулы Башҡортостандың баш ҡалаһына 4 сәғәттә барып етергә мөмкин. 2026 йылдың октябрендә был маршрут Магнитогорскиға тиклем оҙайтыла, ә киләһе йылда «Финистар» Сибайға йөрөй башлай.

«Дүрт сәғәттә Белоретта булыу – ифрат шәп, айырыуса ҡыш көнө был бик уңайлы. Юлдар иркенәйер, — тине Радий Хәбиров. — Тағы бер составты Һамарға ебәрәбеҙ».

Новиков һүҙҙәренсә, Өфөнән Һамарға электр поездары 8 майҙан йома, шәмбе һәм йәкшәмбе көндәрендә йөрөй.

https://www.bashinform.ru/news/social/2026-03-30/iz-ufy-v-beloretsk-mozhno-budet-doehat-na-poezde-za-chetyre-chasa-4631941