Башҡортостандың тораҡ пункттарына мобиль интернет үткәрелә

Быйыл 15 меңгә яҡын кеше йәшәгән тағы ла 40 тораҡ пунктта мобиль бәйләнеш һәм интернет булдырыла. Был хаҡта Башҡортостан Дәүләт идара итеүенең һанлы үҫеш министрлығынан хәбәр иттеләр. «Мәғлүмәттәр иҡтисады һәм дәүләттең һанлы трансформацияһы» милли проекты сиктәрендә ҙур операторҙарҙың береһе уларҙа үҙенең база станцияларын урынлаштыра.

Ведомство мәғлүмәттәренә ярашлы, Баҡалыға – биш, Фёдоровкаға – өс, Дәүләкәнгә һәм Бөрөгә – дүрт, Туймазы, Ауырғазы, Бөрйән, Баймаҡ райондарына ике локация тура килә, ә Белорет, Иглин, Көйөргәҙе, Мәләүез, Әбйәлил, Ҡыйғы, Благовар, Салауат, Дүртөйлө, Ғафури, Дыуан, Борай, Балтас, Балаҡатай, Архангел, Күгәрсен райондарында бер бәләкәй ауылға интернет үткәрелә.

Тотороҡло бәйләнеш һәм интернет ярҙамында алыҫ ауылдарҙа йәшәгән халыҡ дәүләт хеҙмәттәре, медиа, маркетплейстар менән файҙаланыу мөмкинлегенә эйә була, тип билдәләне Башҡортостандың һанлы үҫеш министры Геннадий Разумикин.

https://www.bashinform.ru/news/nacproject/2026-03-11/v-bashkirii-nazvali-mesta-gde-poyavitsya-mobilnyy-internet-4610285