Башҡортостан проекты Рәсәй хөкүмәтенең туризм өлкәһендәге премияһына лайыҡ булды

Бөтәһе 30-ҙан ашыу кеше награда менән бүләкләнде, уларҙың тырышлығы менән эске туризмды үҫтереүгә йүнәлтелгән 10 башланғыс бойомға ашырылды.

Улар иҫәбендә Башҡортостандың «Инвалидтар өсөн әүҙем туризм» проекты ла бар. Премия проектты ойоштороусыларға — Рәсәй инвалидтар спорт союзының төбәк вәкиле Максим Кожуховҡа һәм ойошма президенты Флүр Нурлығаяновҡа, «Салют» республика реабилитация үҙәгенең комплекслы реабилитация буйынса белгесе Әлфиә Самойловаға, Өфө фән һәм технологиялар университеты доценты Александр Токмаковҡа, «Рәсәйҙең спорт туризмы федерацияһы»ның беренсе вице-президенты Алексей Ярошевскийға тапшырылды.

«Беҙҙең «Инвалидтар өсөн әүҙем туризм проекты» — 2013 йылдан Салауат районында ойошторолоп килгән «Туриада-Йүрүҙән» терәк-хәрәкәт ағзалары зыян күргән инвалидтар араһында спорт туризмы буйынса Бөтә Рәсәй фестивале. Фестивалдең төп бурысы — Рәсәйҙә спорт һәм туризм менән шөғөлләнеү аша инвалидтарҙы реабилитациялауға булышлыҡ итеү. Йыл һайын ул Рәсәйҙең төрлө төбәктәренән 18 йәштән 65 йәшкә тиклемге ҡатнашыусыларҙы бергә туплай», — тип һөйләне Максим Кожухов.

Былтыр фестивалдә хәрби бурыстарын үтәгән ваҡытта яраланған МХО яугирҙәре командалары ҡатнашты. Башҡортостандан МХО ветерандары командаһы XII «Йүрүҙән-2025» туриадаһының бронза призеры булды.

https://www.bashinform.ru/news/social/2025-12-29/proekt-iz-bashkirii-udostoen-premii-pravitelstva-rf-v-oblasti-turizma-4523588