Башҡортостанда Милли кейем көнө билдәләнә

Бөгөн, 12 сентябрҙә, Башҡортостанда республика халыҡтарының Милли кейем көнө үткәрелә. Был байрам төбәктә йәшәгән халыҡтарҙың бай һәм матур мәҙәниәтен иҫкә төшөрә. Милли кейемдәр – кейем генә түгел, ә быуындан-быуынға тапшырыла килгән тарих, традициялар һәм рухи мираҫ символы.

Һәр костюм халыҡтың характерын һәм донъяға ҡарашын күрһәтә: биҙәктәр һәм орнаменттар тәрән мәғәнәгә эйә, төҫтәр кәйефте һәм ҡиммәттәрҙе сағылдыра, ә үҙенсәлекле элементтар танылып торған символдарға әүерелә.

Бөгөн Милли кейем көнө уңайынан республиканың төрлө мөйөштәрендә әһәмиәтле датаға арналған саралар ойошторола. Башҡортостандың Милли музейында ЭТНО стилендә көн планлаштырыла. Оҫталар йәрминкәһе, традицион кәсептәр буйынса оҫталыҡ дәрестәре, традицион костюмдар тураһында лекциялар, фотосессия, экскурсия – был сараларға милли костюм кейеп йәки биҙәүестәр тағып, бушлай барырға мөмкин.

Фәйзи Ғәскәров исемендәге дәүләт академия халыҡ бейеүҙәре ансамбле «Беләҙектәр сыңы» күргәҙмәһен ойоштора, унда бейеү өсөн тегелгән костюмдар һәм биҙәүестәр менән танышырға һәм хатта кейеп ҡарарға була. 

Әхмәтзәки Вәлиди исемендәге Милли китапхана «Милли кейем: образ, стиль, рух» түңәрәк өҫтәленә, шулай уҡ башҡорт эстрадаһы артистары ҡатнашлығындағы программаға, халыҡ оҫталарының оҫталыҡ дәрестәренә һәм тематик күргәҙмәләргә саҡыра.

Башҡортостандың Халыҡтар дуҫлығы йорто был көндө «Арт-квадрат»та үткәрергә тәҡдим итә, унда дуҫлыҡ әйлән-бәйләнендә өйөрөлөргә, республика артистары һәм коллективтарының сығыштарын ҡарарға мөмкин.

Аксаков исемендәге мәҙәниәт һәм ял баҡсаһында «Тамға» халыҡ-ара башҡорт милли кейеме оҫталары конкурсының финалы була. Ҡунаҡтарҙы лауреаттарҙың эштәре, күргәҙмә-йәрминкә, фотозона, «Милли кей» балалар уйын зонаһы һәм киске уйындар көтә.

https://www.bashinform.ru/news/social/2025-09-12/v-bashkirii-otmechayut-den-natsionalnogo-kostyuma-narodov-respubliki-4384919