Радий Хәбиров Рәсәй Геройы Риф Сәхәбетдиновты генерал Шайморатов ордены менән бүләкләне. Награданы Башҡортостан Башлығы хөкүмәттең оператив кәңәшмәһендә тапшырҙы.
«Генерал Шайморатов орденын алыуым менән бик ғорурланам. Был минең өсөн оло мәртәбә. Награда мине республикабыҙ өсөн тағы ла күберәк эштәр башҡарырға дәртләндерә, — тине Риф Сәхәбетдинов. — Тыуған яғыиа һәр ваҡыт ашҡынып ҡайтам. Хәҙер тағы ла күңеллерәк, сөнки Башҡортостанда үҙ йортом бар. Ҙур рәхмәт! Рәсәй һәм Башҡортостан мәнфәғәте өсөн бергәләп эшләүебеҙҙе дауам итербеҙ».
Риф Сәхәбетдинов Шишмә районында тыуып үҫкән, бар ғүмерен Рәсәйгә хеҙмәт итеүгә арнаған. Әлеге ваҡытта Санкт-Петербург Хәрби комиссариатының инспекторҙар төркөмө инспекторы булып эшләй.