Төркиәнең Анталия ҡалаһында башҡорт һабантуйы үтте

Төркиәнең Анталия ҡалаһында башҡорт һабантуйы үтте. 24 майҙа яҡташтарыбыҙ Коньяалты районында милли байрам ойошторҙо. Ҡунаҡтарҙы Анталия башҡорттары ойошмаһы етәксеһе Азат Шәйхетдинов сәләмләне. Анталияла башҡорт һабантуйы бишенсе тапҡыр уҙғарыла һәм ҡатнашыусылар йылдан-йыл күберәк, тип һөйләне ул.

Был юлы һабан байрамы ҡунаҡтары араһында Төркиәлә ялға итергә Татарстан журналисы Лилиә Йосопова ла бар ине «Башинформ» агентлығына күрше республиканан коллегабыҙ һөйләүенсә, паркка ингәндә үк ҡунаҡтарҙы самауыр сәйе һәм милли ризыҡтар менән ҡаршы алғандар. Күп кенә ҡунаҡтарҙың милли кейемдә булыуына иғтибар итте ул. 

Һабантуйҙа Башҡортостан йырсыһы Заһир Иҫәнсурин Анталия башҡорттарына тыуған республикабыҙҙан сәләм тапшырҙы һәм үҙенең бер нисә йырын башҡарҙы, шулай уҡ ҡумыҙҙа һәм ҡурайҙа уйнап ишеттерҙе.

Сараны ойоштороусыларҙың береһе, ун йыл Төркиәлә йәшәгән Баймаҡ ҡыҙы, популяр блогер Дилүзә Мәҡсүтова фекеренсә, кеше тыуған иленән ни тиклем алыҫта йәшәй икән, ул үҙенең мәҙәниәтенә, тарихына, йолаларына нығыраҡ тартыла. Бындай байрамдар – ватандаштар менән осрашыу ғына түгелә, ә туған телдә аралашыу, тыуған республика менән бәйләнештәрҙе нығытыу мөмкинлеге лә.

https://www.bashinform.ru/news/culture/2025-06-05/v-turetskoy-antalii-proshel-bashkirskiy-sabantuy-4265002