Ҡорбан байрамында баш ҡаланың 23 мәсетендә байрам намаҙҙары уҡыла

Йома, 6 июндә, мосолмандар Ҡорбан байрамын билдәләй. Был көндө Өфөнөң 23 мәсетендә байрам намаҙҙары уҡыла, вәғәздәр әйтелә, тип хәбәр иттеләр баш ҡала хакимиәтенән.

Бынан тыш, дини йолаларҙы башҡарыу өсөн ике махсус майҙансыҡ эшләй («Карауан» сауҙа комплексы алдында һәм Төньяҡ автовокзал биләмәһендә).

Шулай уҡ 8 июндә «Башҡортостан» лайфстайл-үҙәге алдында йәнә «Ҡорбан Хәләл Фест» ойошторола. Ҡатнашыусылар өсөн концерт программаһы, уйындар, йәрминкә һәм былау менән һыйлау ҡаралған.

Ҡала хакимиәтендә белдереүҙәренсә, байрам уңайынан ҡайһы бер юлдарҙа автотранспорт хәрәкәте сикләнә. Мәҫәлән, 6 июндә таңғы сәғәт 6-нан көндөҙгө 3-кә тиклем Туҡай урамының Цюрупа урамынан Зәйнулла Рәсүлев урамына тиклемге участкаһы, шулай уҡ «Ләлә» мәсете яҡлап Комаров урамының уң һыҙаты ябыла.

Бынан алдараҡ Радий Хәбиров Башҡортостанда Ҡорбан байрамын ойоштороу буйынса йөкләмәләр бирҙе.

12+

https://www.bashinform.ru/news/social/2025-06-04/v-ufe-prazdnichnye-propovedi-v-chest-kurban-bayram-provedut-v-23-mechetyah-4263512