Путин Башҡортостандан технологик олимпиада еңеүсеһенә уңыштар теләне

Президент Владимир Путин Илеш районының Үрге Йәркәй ауылынан Милли технологик олимпиада еңеүсеһе Ләйлә Шәриповаға уңыштар теләне. Осрашыу кисә Кремлдең Екатерина залында «Рәсәй — мөмкинлектәр иле» ойошмаһының күҙәтеү советы барышында үтте.

Сарала күҙәтеү советы ағзалары һәм төрлө конкурстар һәм олимпиадалар, шул иҫәптән «Рәсәй лидерҙары», «Был беҙҙең ғаиләнеке», «Мәғариф флагмандары», «ТопБЛО», «Мин — профессионал», Халыҡ-ара инженер чемпионаты, Милли технологик олимпиада еңеүселәре ҡатнашты.

«Рәсәй — мөмкинлектәр иле» платформаһында уҡыусылар өсөн дә проекттар бар. Милли технологик олимпиада айырыуса популяр. Үрге Йәркәй ауылы Т.Рахманов исемендәге мәктәбенең 10-сы класс уҡыусыһы Ләйлә Шәрипова – тап шундай олимпиада еңеүсеһе.

Ул Владимир Путинға ошо олимпиадала ҡатнашыу тормошон нисек үҙгәртеүе тураһында һөйләне.

 — Хәйерле көн. Миңә 17 йәш, Башҡортостандың Илеш районы Үрге Йәркәй ауылынанмын. Ғаиләбеҙҙә өс ҡыҙ, ата-әсәй беҙҙе бала саҡтан эшкә өйрәтә. Мәҫәлән, бергәләп картуф ултыртабыҙ, велосипедтар йүнәтәбеҙ, үлән сабабыҙ. Беҙҙең территория ҙур, элек ябай ғына үлән сабыу машинаһы бар ине, ул йыш ватыла торғайны. Атай уны йүнәткәндә беҙҙе ярҙамға саҡыра, механизмдарын аңлата. Физика, технологиялар менән ҡыҙыҡһыныуым шунан башланғандыр тип уйлайым, — тине йәш яҡташыбыҙ.

Президент Ләйләгә уңыштар теләне һәм робототехника өлкәһендә үҫеш перспективаларын билдәләне.

https://www.bashinform.ru/news/social/2025-05-28/putin-pozhelal-uspehov-pobeditelnitse-tehnologicheskoy-olimpiady-iz-bashkirii-4253034