Архангел районында йәшәүселәргә һәләк булған мал өсөн аҡса түләйҙәр

Архангел районының Аҙау ауылы халҡына был аҙнала уҡ ташҡын килтергән зыянды иҫәпләп, компенсация түләнергә тейеш. Башҡортостан Башлығы хөкүмәттең оператив кәңәшмәһендә ошондай йөкләмә бирҙе. Әлеге ваҡытта халыҡтан 91 ғариза ҡабул ителгән, 29 кеше компенсация алған. Хәтерегеҙгә төшөрәбеҙ, ҡануниәт буйынса һәр кешегә 10 мең һум тейеш, әммә ғаиләгә 50 мең һумдан артыҡ түгел. Аҡсаны тик милек хужалары ғына алырға мөмкин. Бынан тыш, һәләк булған малдың хаҡы компенсациялана.

«Кешеләр  мал-тыуарһыҙ ҡалды, уны 10 мең һумға һатып алып булмай. Шуға күрә беҙ компенсацияларға булдыҡ, финанслау сығанағы бар», – тине республика етәксеһе.

Бынан тыш, Радий Хәбиров емерелгән юлдарҙы тәртипкә килтереү өсөн тиҙерәк аҡса бүлергә ҡушты.

Бынан алдараҡ Башинформ Архангел районының ташҡындан зыян күргән ауылдарында тергеҙеү эштәренең нисек барыуы хаҡында хәбәр иткәйне.

https://www.bashinform.ru/news/social/2025-03-24/zhitelyam-arhangelskogo-rayona-bashkirii-vyplatyat-dengi-za-pogibshiy-skot-4169573