Владимир Путин Башҡортостандан йөҙйәшәр инәйҙе юбилейы менән ҡотланы

Салауат районының Нәсибаш ауылынан Сания Әхмәтова 100 йәшлек юбилейын билдәләне. Ошо уңайҙан яҡташыбыҙҙы ил президенты Владимир Путин ҡотланы.

«Беҙ һеҙҙең быуын – еңеүселәр быуыны менән ихлас ғорурланабыҙ. Һеҙ Бөйөк Ватан һуғышының ауыр һынауҙарын намыҫ менән үттегеҙ, ә һуғыштан һуң иптәштәрегеҙ, халҡыбыҙ менән илде тергеҙҙегеҙ. Тормош юлығыҙ һәр саҡ  ныҡлыҡ, изгелеккә һәм ғәҙеллеккә ышаныс, Тыуған илгә тәрән һөйөү өлгөһө булып хеҙмәт итер»,  — тиелә ҡотлау телеграммаһында.

Сания Әхмәтова 1925 йылда Салауат районының Нәсибаш ауылында тыуған. Бөйөк Ватан һуғышында ҡатнашыусының тол ҡатыны, тыл эшсәне, хеҙмәт ветераны. Бөгөн йөҙйәшәр инәй балалары, ейән-ейәнсәрҙәре һәм бүлә-бүләсәрҙәре хәстәрлегенә солғанып йәшәй. 

Бынан алдараҡ «Башинформ» Башҡортостанда һуғыш ветеранының 100 йыллыҡ юбилейын билдәләүе тураһында хәбәр иткәйне.

https://www.bashinform.ru/news/social/2025-02-04/vladimir-putin-pozdravil-zhitelnitsu-bashkirii-s-vekovym-yubileem-4107161