Баймаҡ районының Темәс ауылы балалар баҡсаһы урындағы башланғыстарҙы яҡлау программаһында ҡатнаша

Башҡортостанда урындағы башланғыстарҙы яҡлау программаһы буйынса тормошҡа ашырылған проекттар һаны йылдан-йыл арта. Мөһим программала ҡатнашыусылар араһында Баймаҡ районы Темәс ауылының «Йәйғор» балалар баҡсаһы ла бар. Был хаҡта «Башинформ» агентлығына Айгөл Байрамғолова хәбәр итте.

Уйын майҙансыҡтарын яңыртыу балаларҙың сәләмәтлеген саф һауала нығытыуға, уйын эшмәкәрлеген ҡыҙыҡлыраҡ, хәүефһеҙерәк итеп ойошторорға ярҙам итер ине тигән маҡсаттан сығып, дәртләнеп эшкә тотондоҡ, ти Айгөл Байрамғолова.

– Урындағы башланғыстарҙы яҡлау программаһында ҡатнашып, еңеп сығырға һәм уйлағанды тормошҡа ашырырға тигән ҡарарға килдек. Балалар баҡсаһына уйын ҡоролмаларын һатып алып урынлаштырыу проекты буйынса ойошторолған сараларға ата-әсәләр, балалар баҡсаһы хеҙмәткәрҙәре, ауыл халҡы әүҙем ҡушылды.Проекттың тормошҡа ашырылыуы инициатив төркөмдөң әүҙемлегенә лә бәйле. Улар халыҡ менән эшләй, бағыусылар эҙләй, сығыштар, йыйылыштар үткәрә, документтар туплай, гәзит-журналдарҙа сығыш яһай. Балалар баҡсаһы тәрбиәләнеүселәре лә үҙҙәренең сағыу һүрәттәре аша, татлы хыялдары уйын майҙансығын һүрәтләй, – тип хәбәр итте ауыл хакимиәте башлығы Айгөл Байрамғолова.