Өфөлә ремонттан һуң туберкулез диспансерының балалар бүлексәһе асылды

Өфөлә капиталь ремонттан һуң туберкулезға ҡаршы диспансерҙың балалар бүлексәһе асылды. Был Өфөнөң медицина учреждениеларын яңыртыу республика программаһы сиктәрендә файҙаланыуға тапшырылған беренсе объект булып тора. Бөгөн учреждениеға Башҡортостандың һаулыҡ һаҡлау министры вазифаһын башҡарыусы Айрат Рәхмәтуллин килде.

Ведомство етәксеһе ремонт эштәренән тыш, бүлексәне яңы медицина ҡорамалдары, мебель, офис техникаһы менән йыһазландырыу хаҡында һөйләне. Әсә һәм бала бүлмәһе, уйын бүлмәһе булдырылды, һауа таҙартҡысы булған заманса елләтеү системаһы ҡуйылды.

«Беҙҙең өсөн уңайлы шарттар булдырыу мөһим ине, сөнки туберкулез менән сирләгән пациенттар оҙаҡ дауаланырға мәжбүр, бының хатта ике йылға һуҙылыуы мөмкин», — тип билдәләне һаулыҡ һаҡлау министры.

Айрат Рәхмәтуллин һүҙҙәренсә, Башҡортостан Башлығы Радий Хәбировтың ҡушыуы буйынса Өфөнөң медицина учреждениеларын яңыртыу программаһына 118 медицина объекты индерелде. Алты йылда дөйөм финанслау күләме — 8 миллиард һум.

Быйыл программала алты медицина ойошмаһы ҡатнаша.

https://www.bashinform.ru/news/social/2024-11-20/v-ufe-posle-remonta-otkryli-detskoe-otdelenie-protivotuberkuleznogo-dispansera-4016465