Әбйәлилдәр МХО яугирҙарына күсмә мунса ебәрҙе

Әбйәлил районының Амангилде ауыл биләмәһе халҡы махсус операцияла ҡатнашҡан яҡташтарына әүҙем ярҙам күрһәтә. Уҙған йылда Ҡаҙмаш ауылында яугирҙарҙың үтенесе буйынса күсмә мунсалар төҙөүгә тотонғандар. Төҙөлөштө башлап ебәргән инициатив төркөмгә бөтә ауыл ир-егеттәре ҡушылған. Изге эштә Амангилде ауылы биләмәһе башлығы үҙе әүҙем ҡатнаша.

– Былтыр алғы һыҙыҡҡа ике күсмә мунса ебәрҙек. Күптән түгел тағы ла берәүһен тамамланыҡ. Кисә ауылдаштар дүрт машина гуманитар ярҙам менән МХО зонаһына юлланды. Яугирҙарға күсмә мунса ғына түгел, йылы кейем, дарыуҙар, аҙыҡ-түлек һәм башҡа кәрәк-яраҡтар ебәрҙек. Ауыл халҡы менән 100 мең һумдан ашыу аҡса йыйҙыҡ. Һәр кемгә хеҙмәте, ярҙамы өсөн ҙур рәхмәтебеҙҙе белдерәбеҙ, — тип һөйләне «Башинформ» агентлығына Ҡаҙмаш мәктәбе директоры Зариф Атауллин.

Илгә килгән һынауға Ишкилде ауылында йәшәүселәр ҙә битараф түгел. Бында ҡатын-ҡыҙҙар яугирҙарға йөн ойоҡбаштар һәм бейәләйҙәр бәйләй.

– Ошо көндәрҙә 10 пар ойоҡбаш әҙерләнек, ауыл клубы мөдире уларҙы район үҙәгенә тапшырасаҡ. Ял көндәрендә ҡатын-ҡыҙҙар менән клубта йыйылабыҙ, өйҙә лә бәйләйбеҙ. Яҡташтарыбыҙға ғына түгел, барлыҡ махсус операция яугирҙарына ярҙам итәбеҙ. Күптән түгел сифатлы итектәр һәм башҡа кәрәк-яраҡтар һатып алып ебәрҙек, – ти Нурия Усманова.

Урал аръяғы халҡы МХО-ла ҡатнашыусыларға айырыуса әүҙем ярҙам күрһәтә. Әйтәйек, Баймаҡ районы алғы һыҙыҡҡа 26 ҙур гуманитар ылау, атап әйткәндә, 14 машина (УАЗ, «Нива»), 7 «Урал» мотоциклы, 9 күсмә мунса, запас частар, дронға ҡаршы саралар, буржуйка-мейестәр, эш ҡоралдары, бысҡылар, тепловизор, йылы кейем һәм башҡа кәрәк-яраҡтар ебәрҙе. «Башинформ» шулай уҡ Ейәнсура районынан үҙ теләге менән МХО-ға киткән өс ағалы-ҡустылы хаҡында яҙҙы.