Башҡортостан депутаттары туриндустрия хеҙмәткәрҙәре өсөн маҡтаулы исем булдырыуҙы хупланы

Башҡортостан Дәүләт Йыйылышы беренсе уҡыуҙа «Башҡортостан Республикаһының дәүләт наградалары һәм маҡтаулы исемдәре тураһында» Башҡортостан Республикаһы Законының 2-се статьяһына үҙгәрештәр индереү тураһында» закон проектын хупланы. Уға ярашлы, республикала «Башҡортостан Республикаһының атҡаҙанған туризм өлкәһе хеҙмәткәре» тигән яңы маҡтаулы исем индерергә тәҡдим ителә. Ул юғары һөнәри оҫталыҡ һәм күп йыллыҡ намыҫлы хеҙмәт өсөн бирелергә тейеш.

Башҡортостан Дәүләт Йыйылышының пленар ултырышында республиканың эшҡыуарлыҡ һәм туризм министры вазифаһын башҡарыусы Зөһрә Гордиенко билдәләүенсә, әле Башҡортостандың туристик тармағында 20 меңгә яҡын кеше эшләй. Яңы маҡтаулы исем һөнәрҙең абруйын күтәреү өсөн шарттар тыуҙырыр ине. Алтай, Хабаровск крайҙарында, Кострома, Мәскәү өлкәләрендә, Крымда һәм Адыгеяла бындай исемдәр бар. Федераль кимәлдә лә булдырыу планлаштырыла.

Бынан алдараҡ «Башинформ» Башҡортостан Дәүләт Йыйылышы депутатының хәрби хәрәкәттәр ветераны танытмаһы алыуын хәбәр иткәйне.

https://www.bashinform.ru/news/social/2024-10-25/deputaty-bashkirii-odobrili-vvedenie-pochetnogo-zvaniya-dlya-rabotnikov-turindustrii-3983837