«Башинформ»дың «Бәхет — ул бергә» медиапроекты илдә иң яҡшыһы тип танылды

«Башинформ» мәғлүмәт агентлығының «Бәхет — ул бергә» махсус проекты Сочиҙа «Бөтә Рәсәй-2024» медиафорумының һөнәри конкурсында еңеү яуланы. Башҡортостандың төп мәғлүмәт агентлығының медиапродукты «Йылдың махсус проекты/ акцияһы» номинацияһында иң яҡшыһы тип танылды. Илдең Журналистар союзы рәйесе Владимир Соловьев төп бүләкте — Рәсәй Журналистар союзы статуэткаһын һәм еңеүсе дипломын «Башинформ» мәғлүмәт агентлығының баш мөхәррире Руслан Шәрәфетдиновҡа тапшырҙы.

Конкурсҡа тотош илдән меңгә яҡын эш килгән. «Махсус проект» номинацияһында — 252, «Киң мәғлүмәт сараларында иң яҡшы аккаунт» номинацияһында 98 ғариза бирелгән.

«Бәхет — ул бергә» проекты — «Башинформ» мәғлүмәт агентлығы коллективының берлектәге эш һөҙөмтәһе. Уны бойомға ашырыу өҫтөндә ҙур команда эшләй: генераль директор вазифаһын башҡарыусы Дилә Сәғитова, баш мөхәррир Руслан Шәрәфетдинов, баш мөхәррир урынбаҫары Ольга Горюнова, баш бухгалтер Екатерина Амплева, проекттың координаторы Екатерина Камалова, хәбәрсе Әлфиә Әһлиуллина, фотохәбәрсе Валерий Шахов, бильдредактор Татьяна Кадыкова. Шулай уҡ «Рәсәйҙең эшлекле ҡатын-ҡыҙҙары» йәмәғәт ойошмаһы проекттың партнеры булып тора.

«Башинформ»дың баш мөхәррире Руслан Шәрәфетдинов билдәләүенсә, һөнәрилек һәр ваҡыт һәр ерҙә булырға тейеш.

«Был проектта — бигерәк тә, сөнки беҙҙең геройҙар — һаулыҡ мөмкинлектәре сикле кешеләр», — тип билдәләне Руслан Шәрәфетдинов.

https://www.bashinform.ru/news/social/2024-09-23/spetsproekt-i-stati-bashinforma-otmecheny-nagradami-soyuza-zhurnalistov-rossii-3940913