Радий Хәбиров «Китап» нәшриәтенең яңы магазинында булды

Өфө буйлап эш сәфәре барышында Башҡортостан Башлығы Радий Хәбиров «Китап» нәшриәтенең яңы фирма магазинында булды. Магазин 2024 йылдың 14 сентябрендә Өфөнөң тарихи үҙәгендә асылды (Ленин урамы, 26-сы йорт). Зәйнәб Биишева исемендәге «Китап» нәшриәте директоры вазифаһын башҡарыусы Эльмира Хәйретдинова һүҙҙәренсә, яңы фирма магазинының сауҙа залында «Китап» һәм «Башҡорт энциклопедияһы» нәшриәттәренең продукцияһы, рус, башҡорт, татар, удмурт, инглиз, немец һм башҡа сит төбәктәрҙең милли әҙәбиәте бар.

Шулай уҡ бында Рус география йәмғиәтенең, Рәсәй хәрби-тарихи йәмғиәтенең эксклюзив баҫмаларын һатып алырға мөмкин. Балалар өсөн китаптар, ижад өсөн тауарҙар, өҫтәл уйындары, баш ҡаланың 450 йыллығына арналған сувенир продукцияһы ассортименты киң.

Магазин заманса этностилдә биҙәлгән. Бында яҙыусылар менән осрашыу, журналистар, шағирҙар менән оҫталыҡ дәрестәре, фотокүргәҙмәләр, балалар һәм үҫмерҙәр өсөн саралар үткәреү өсөн махсус урын, китап уҡыусылар өсөн лаунж-зона булдырылған.

Радий Хәбиров нәшриәттең яңы китаптары менән танышты һәм абруйлы ҡунаҡтар китабында үҙенең теләктәрен яҙып ҡалдырҙы. Республика етәксеһе шулай уҡ баш ҡаланың юбилейы айҡанлы баҫылып сыҡҡан Өфө тарихы һәм уның бөгөнгөһө хаҡында ике китап, шулай уҡ «Аҡмулла васыяттары» китабын һатып алды.

«Ленин урамында туристар күп йөрөй. Республика халҡы өсөн дә уңайлы урын, барыһын да беҙҙең нәшриәт магазинына саҡырам, бик матур һәм заманса килеп сыҡты», - тине Радий Хәбиров.

Белешмә:

2024 йылда «Китап» нәшриәте 105 йыллығын билдәләй. 1919 йылдың 16 октябре уның тыуған көнө тип иҫәпләнә.

https://www.bashinform.ru/news/social/2024-09-20/radiy-habirov-posetil-novyy-magazin-izdatelstva-kitap-v-ufe-3938421