«Һаранламағыҙ»: Башҡортостан Башлығы Ейәнсура районында ихатаны яңыртырға ҡушты

Башҡортостан хөкүмәтенең оператив кәңәшмәһендә Башҡортостан Башлығы Торлаҡ-коммуналь хужалыҡ министрлығына Ейәнсура районы үҙәгендәге ихатаны «Башҡорт ихаталары» программаһына индерергә ҡушты.

«Унда бер генә ихатаны эшләргә ҡалды. Һаранламағыҙ, күпме һорайҙар, шунса бирегеҙ. Был ихатаны 2025 йылға ҡуйығыҙ. Район башлығы быйыл да халыҡ менән мәсьәләне тикшереп, барыһын да килеште. Яҡшы ихата эшләгеҙ», – тине төбәк етәксеһе.

Иҫегеҙгә төшөрәбеҙ, быға тиклем «Башинформ» һуңғы биш йылда республикала «Башҡорт ихаталары» программаһы буйынса 1,3 меңдән ашыу ихата йәшелләндерелеүе хаҡында яҙғайны. 2024 йылда 143 биләмәне яңыртыу күҙаллана.

Республикала «Башҡорт ихаталары» программаһы Башҡортостан Башлығы Радий Хәбиров башланғысы менән 2019 йылда эшләй башланы. 2023 йылда уны финанслау 1,2 миллиард һумға тиклем артты.

Өфөләге йәмәғәт киңлектәренең нисек үҙгәреүе хаҡында «Башинформ» агентлығының мәҡәләһендә уҡығыҙ.