Башҡорт һәм татар эстрадаһы йондоҙо Гүзәл Уразова баш ҡалабыҙҙың юбилейына «Өфө йүкәләре» йырына клип сығарҙы. Элегерәк был йырҙы Фидан Ғафаров, Алһыу, Айҙар Ғәлимов башҡарыуында тыңларға мөмкин ине.
Өфө мэрияһынан хәбәр итеүҙәренсә, Гүзәл Уразова был йырҙы 31 августа, Өфөнөң юбилейында, ҡала майҙанында башҡара.
«Өфө йүкәләре» — күптәрҙең яратҡан йыры, Өфө гимны тип әйтһәк тә була. Өфө ҡалаһы мэры Ратмир Рафил улы ошо матур йырҙы башҡарыуымды һорап мөрәжәғәт иткәс, шатланып риза булдым. Бик матур килеп сыҡты, шикелле. Һеҙгә лә оҡшар тип ышанам. Өфөнөң күркәм юбилейына бүләк. Бөгөндән барлыҡ музыкаль майҙансыҡтарҙа», — тип яҙа Гүзәл Уразова.
Хәбәр иткәнебеҙсә, Өфөнөң юбилейы айҡанлы Рәсәй эстрадаһы йондоҙҙарының концерты һәм ваҡыт капсулаһын һалыу тантанаһы көтөлә.