Өфөнөң 450 йыллығына бағышланған флаг — Төньяҡ ҡотопта

Төньяҡ ҡотопта Өфөнөң 450 йыллығына арналған флаг елберләй, тип хәбәр итте «Еңеүгә 50 йыл» атом боҙватҡысындағы экспедиция составына ингән баш ҡалабыҙҙың Йәмәғәт палатаһы рәйесе Ольга Одинокова. Билдәле сәйәхәтсе Федор Конюхов, шулай уҡ «Еңеүгә 50 йыл» атом боҙватҡысы командиры Руслан Сасов флагҡа өфөләргә теләктәр яҙып, ҡултамғаларын ҡуйған.

«Мэр беҙгә әһәмиәтле дата — Өфөнөң 450 йыллығы билдәләнгән флагты Төньяҡ ҡотопҡа алып барыу мөмкинлеге бирҙе, — тине Ольга Одинокова. — Беҙ Федор Филиппович менән аралаштыҡ. Ул Өфөнө юбилейы менән ҡотланы һәм ҡала халҡына иң изге теләктәрен еткерҙе».

Өфө хакимиәтенең матбуғат хеҙмәтендә белдереүҙәренсә, экспедицияның төп маҡсаттарының береһе — донъя рекордтары ҡуйыу. Мәҫәлән, Федор Конюхов пилот Игорь Потапкин менән боҙҙан паралетта осоп китеп, ҡатмарлы һауа шарттарында 440 километр ара үтеп, туп-тура Төньяҡ ҡотопҡа төштө. Бер кемдең һис ҡасан ошондай киңлектәрҙә һәм алыҫлыҡҡа паралетта осҡаны юҡ ине. Тағы бер рекорд — Төньяҡ полюста боҙ ватҡыс палубаһы буйлап 50 километрға йүгереү. Владимир Волошин дистанцияны 5 сәғәт 26 минут эсендә үтте. Тағы ла дүрт кеше боҙватҡыс буйлап 21 саҡрымға ярыммарафон йүгерҙе.

https://www.bashinform.ru/news/social/2024-07-16/na-severnyy-polyus-dostavili-flag-posvyaschennyy-450-letiyu-ufy-3850013