Өфө хакимиәтендә — кадрҙар үҙгәреше

Бөгөн оператив кәңәшмәлә Өфө хакимиәте башлығы Ратмир Мәүлиев ике муниципаль учреждениеның яңы етәкселәре менән таныштырҙы. Федоровка районында тыуып үҫкән 59 йәшлек Ринат Ниғмәтуллин «Ҡаланы йәшелләндереү хужалығы» директоры итеп тәғәйенләнде.

Ринат Ниғмәтуллин Башҡортостан ауыл хужалығы институтын («Урман хужалығы» һөнәре), шулай уҡ Урал дәүләт техник университетын («Финанс һәм кредит») тамамлаған. Оҙаҡ йылдар Башҡортостан Республикаһының Милли банкында эшләй. Һуңғы ярты йылда «Ҡаланы йәшелләндереү хужалығы» директорының финанс-иҡтисади эше буйынса урынбаҫары вазифаһын биләй.

Өфөнөң «Ҡаланы йыйыштырыу буйынса махсуслашҡан автомобиль хужалығы» етәксеһе итеп Рәмис Зиакаев тәғәйенләнде, тип белдерҙеләр мэрияла.

Ул 1981 йылда Иркутск өлкәһенең Ангарск ҡалаһында тыуған. Мәскәү дәүләт иҡтисад, статистика һәм информатика университетын тамамлаған.

Рәмис Зиакаевтың хеҙмәт эшмәкәрлеге ресурстар менән тәьмин итеүсе предприятиелар менән бәйле: «Өфө инженер селтәрҙәре», «Республика коммуналь компанияһы», «Өфө һыу каналы». Һуңғы ярты йылда «Ҡаланы йыйыштырыу буйынса махсуслашҡан автомобиль хужалығы» директоры урынбаҫары булып эшләй.

Башинформ хәбәр иткәнсә, быйыл майҙа Илдар Сәлихов Өфө хакимиәтенең транспорт һәм элемтә идаралығы начальнигы итеп тәғәйенләнде. Өфө хакимиәтенең коммуналь хужалыҡ һәм төҙөкләндереү идаралығы етәксеһе вазифаһы иһә Арсен Латиповҡа йөкмәтелде.

https://www.bashinform.ru/news/social/2024-07-16/v-merii-ufy-proizoshli-kadrovye-izmeneniya-3850557