Башҡортостанда уртаса ғүмер оҙайлығы 73 йәштән уҙҙы

Башҡортостанда уртаса ғүмер оҙайлығы 73 йәштән уҙҙы. Был иһә республика тарихында рекордлы күрһәткес. Әммә республикабыҙҙа төп бурыс уртаса ғүмер оҙайлығын арттырыу ғына түгел, уның сифатын да күтәреү. Башҡортостан Башлығы хакимиәте етәксеһе Максим Забелин шулай тип иҫәпләй.

Бөгөн Максим Забелин Дәүләт Думаһының һаулыҡ һаҡлау буйынса комитетының республика Дәүләт Йыйылышында уҙған күсмә ултырышы эшендә ҡатнашты. Унда «Өлкән быуын» федераль проектын ғәмәлгә ашырыу тураһында һүҙ барҙы.

«Һис шикһеҙ, бында тәү сиратта һаулыҡ һаҡлау өлкәһен нығытыуға көс һалына. Башҡортостанда был мәсьәләгә республика етәксеһе Радий Хәбиров яғынан етди иғтибар бүленә. Бер нисә һан килтерәм. 2019 йылдан башлап төбәктә 14 заманса поликлиника һәм дауахана, 350-нән ашыу фельдшер-акушерлыҡ пункты төҙөлгән. Былтыр ғына 4 поликлиника һәм бер ашығыс медицина ярҙамы дауаханаһы сафҡа индерелгән, 4230 берәмек ҡорамал һәм 185 берәмек медицина автотранспорты һатып алынған. Был эш әле лә дауам ителә.

Йәшәү сифатына башҡа факторҙар ҙа йоғонто яһай. Социаль йүнәлеш, ололар өсөн тейешле инфраструктураның булыуы, уңайлы шарттар булдырыу. Белеүегеҙсә, беҙҙең ҡыҙыҡлы һәм күптәр яратып өлгөргән «Башҡортостанда оҙон ғүмерлелек» проекты бар. Ошо йылдар дауамында уға 690 меңдән ашыу кеше йәлеп ителде. Бынан тыш, ололарға республика буйлап экскурсияларға сертификаттар бирелә һәм илдәге, шулай уҡ Белоруссияға туристик сәфәрҙәр субсидиялана. Быйыл көҙҙән башлап Үзбәкстан йүнәлешендә әүҙем эшләргә уйлайбыҙ.

Республикала ГТО нормативтарын үтәгән 60 йәштән өлкәнерәк граждандарға спорт ойошмаларында бушлай шөғөлләнеү өсөн 10 мең һумлыҡ сертификат тапшырыла. Быйыл 2 250 кешегә бирелә. Был проект илдә иң яҡшыларҙың береһе тип танылды.

Иң мөһиме — тормошҡа ҡыҙыҡһыныуҙы юғалтмау. Ә беҙ был йәһәттән ярҙам итергә әҙер», — тип билдәләне Максим Забелин.

https://www.bashinform.ru/news/social/2024-07-12/v-bashkirii-srednyaya-prodolzhitelnost-zhizni-prevysila-73-goda-3846630