Башҡортостан ғаиләһе «Был беҙҙең ғаиләнеке» конкурсында еңгән өсөн 5 миллион һум аҡса менән бүләкләнә

Башҡортостандан Ғәйнетдиновтар-Фәйзуллиндар ғаиләһенә «Был беҙҙең ғаиләнеке!» конкурсында еңгән өсөн 5 миллион һум аҡса тапшырыла. Был хаҡта республиканың ғаилә, хеҙмәт һәм халыҡты социаль яҡлау министры Ленара Иванова хәбәр итте.

«Беҙҙең Ғәйнетдиновтар-Фәйзуллиндар ғаиләһе Рәсәй кимәлендә үткәрелгән «Был беҙҙең ғаиләнеке» конкурсында еңеү яуланы. Улар барлыҡ һынауҙарҙы лайыҡлы үтеп, торлаҡ шарттарын яҡшыртыу өсөн 5 миллион һум аҡсалата бүләкле булды! Афарин! Ҡотлайбыҙ! Ғорурланабыҙ!», — тип яҙа министр социаль селтәрҙә.

Ғәйнетдиновтар-Фәйзуллиндарҙың ғаилә командаһы конкурста Өфө исеменән сығыш яһаны. Улар музыка ярата, төрлө ижади сараларҙа һәм музыкаль конкурстарҙа ҡатнаша.

«Ҡыҙыбыҙ беҙ еңгәнбеҙ икән тип төш күргән, шулай килеп сыҡты ла! Бик мауыҡтырғыс булды! «Рәсәй  — мөмкинлектәр иле» платформаһына тормошҡа ашҡан хыялдар өсөн рәхмәт!» — тип тәьҫораттары менән уртаҡлашты ғаилә финалға сыҡҡас.

«Рәсәй — мөмкинлектәр иле» президент платформаһының халыҡ проектында Рәсәйҙең 89 төбәгенән 102 735 ғаилә командаһынан 587 250 кеше һәм уларҙың 81 илдә йәшәгән туғандары ҡатнашты.

«Был беҙҙең ғаиләнеке» конкурсын ойоштороусы — «Рәсәй — мөмкинлектәр иле» ойошмаһы.

Хәбәр иткәнебеҙсә, Башҡортостандан ете ғаилә «Был беҙҙең ғаиләнеке» конкурсының финалына сыҡты.

https://www.bashinform.ru/news/social/2024-07-09/semya-iz-bashkirii-poluchit-5-mln-rub-za-pobedu-v-konkurse-eto-u-nas-semeynoe-3840417