Республиканың биш районына һәм ике ҡалаһына «сәләмәтлек поездары» килә

Был аҙнала Башҡортостанда табиптарҙың мобиль бригадалары Кушнаренко, Стәрлетамаҡ, Мәсетле, Бәләбәй һәм Бөрйән райондарына, шулай уҡ Нефтекама һәм Ағиҙел ҡалаларына килә. Хөкүмәттең Республика менән идара итеү үҙәгендә уҙған оператив кәңәшмәһендә «Сәләмәт республика — сәләмәт төбәк» акцияһының эш графигы тураһында һаулыҡ һаҡлау министры Айрат Рәхмәтуллин һөйләне.

Айрат Рәхмәтуллин һүҙҙәренсә, 15 апрелдән 5 июлгә хәтлем табиптар 169 тораҡ пунктта 93 меңдән ашыу пациентты ҡараған һәм 22 меңдән ашыу рентген тикшереүе үткәргән. Һөҙөмтәлә 2112 сир асыҡланған, күбеһенсә йөрәк-ҡан тамырҙары ауырыуҙары, диабет һәм яман шеш. Бөтә пациенттар ҙа ентекле тикшереү үтергә ебәрелгән.

Башҡортостандың Һаулыҡ һаҡлау министрлығында «сәләмәтлек поездары» эшенең һөҙөмтәлелеге тураһында һөйләнеләр.

https://www.bashinform.ru/news/social/2024-07-08/v-bashkirii-poezda-zdorovya-priedut-k-zhitelyam-pyati-rayonov-i-dvuh-gorodov-3838973