Башҡортостанда туғыҙынсылар һәм ун беренселәр өсөн сығарылыш кисәләре көндәре билдәле булды

Башҡортостандың мәғариф министры Илдар Мәүлитбирҙин туғыҙынсы һәм ун беренсе кластар өсөн сығарылыш кисәләренең көнөн әйтте.

«Сығарылыш кисәләре — һәр уҡыусы тормошонда иҫтәлекле ваҡиға. Улар уҡытыусылары, класташтары һәм, ғөмүмән, мәктәп тормошо менән хушлаша. Башҡортостанда мәктәп тамамлаусыларға аттестат тапшырыу көнө билдәләнде:

Туғыҙынсылар — 2024 йылдың 28 июнендә (йома);

Ун беренселәр — 2024 йылдың 29 июнендә (шәмбе)», — тип яҙа министр социаль селтәрҙәге сәхифәһендә.

Кисәләрҙе үткәргәндә хәүефһеҙлек ҡағиҙәләрен мотлаҡ үтәү кәрәклеген дә иҫкә төшөрҙө ул.

Быйыл Башҡортостанда туғыҙынсы класты — 50 меңдән ашыу, ә ун беренсе класты 15 меңгә яҡын уҡыусы тамамлай.

Шулай уҡ уҡыуҙағы айырым ҡаҙаныштар өсөн беренсе йәки икенсе дәрәжә миҙал алырға мөмкин. Беренсеһе — алтын, икенсеһе — көмөш.

https://www.bashinform.ru/news/social/2024-06-25/glava-minobrazovaniya-bashkirii-nazval-daty-vypusknyh-dlya-9-i-11-klassov-3822282