Радий Хәбиров республиканың иң яҡшы киң мәғлүмәт саралары хеҙмәткәрҙәренә дәүләт наградалары тапшырҙы

14 июндә «Медиайыйын»дың пленар ултырышында Башҡортостан Башлығы Радий Хәбиров иң яҡшы матбуғат һәм киң мәғлүмәт саралары хеҙмәткәрҙәренә республиканың дәүләт наградалары тапшырҙы.

Бүләкләнеүселәр араһында хеҙмәттәшебеҙ – «Башинформ» мәғлүмәт агентлығы хәбәрсеһе Ольга Мортазина ла бар. Ул «Башҡортостан Республикаһының атҡаҙанған матбуғат һәм киң мәғлүмәт саралары хеҙмәткәре» тигән маҡтаулы исемгә лайыҡ булды. Шулай уҡ бөгөн Башҡортостан юлдаш телеканалының баш режиссеры Ярослава Феоктистова, ижтимағи-сәйәси тапшырыуҙар редакцияһы етәксеһе Фәйрүзә Фәтхуллина, республикала билдәле журналист Светлана Вәлиева, «Стерлитамакский рабочий» гәзите редакцияһы фотохәбәрсеһе Сергей Красков, Башҡортостан юлдаш телеканалының мәғлүмәт тапшырыуҙары мөхәррире Рәйлә Күсемханова, «Вся Уфа » телеканалы режиссеры Альбина Романова, «Әллүки» журналының баш мөхәррир урынбаҫары Юлиә Төхвәтуллина, Зәйнәб Биишева исемендәге Башҡортостан «Китап» нәшриәтенең нәфис әҙәбиәт редакцияһы мөхәррире Гөлназ Фазлиәхмәтова, «Йәшлек» гәзите редакцияһының бүлек мөдире Зөһрә Йәһүҙина, «Башҡортостан» гәзите редакцияһының мәғариф бүлеге мөдире Гөлдәр Яҡшығолова мәртәбәле исем менән бүләкләнде.

Радий Хәбиров Башҡортостан юлдаш телеканалының яңылыҡтар хеҙмәте етәксеһе Роза Хәбибуллинаға, «Башҡортостан» дәүләт телерадиокомпанияһы монтажсыһы Зарема Хисмәтуллинаға, Матбуғат һәм киң мәғлүмәт саралары агентлығының баш белгес-эксперты Зәлиә Сәхипгәрәеваға, Шишмә мәғлүмәт үҙәге тәржемәсеһе Люциә Үлямаеваға Башҡортостандың Маҡтау грамотаһын тапшырҙы.

https://www.bashinform.ru/news/social/2024-06-14/radiy-habirov-vruchil-gosudarstvennye-nagrady-luchshim-rabotnikam-smi-respubliki-3809533