Башҡортостанда география, химия һәм әҙәбиәт буйынса БДИ һөҙөмтәләре билдәле булды

Башҡортостанда 23 майҙа география, химия һәм әҙәбиәттән уҙғарылған имтихан һөҙөмтәләре билдәле булды. Был хаҡта Башҡортостан хөкүмәте премьер-министрының беренсе урынбаҫары Урал Килсенбаев «Бәйләнештә»ге сәхифәһендә хәбәр итте.

Уның һүҙҙәренсә, быйыл республикала химия буйынса йөҙ балл йыйған эштәр — 45. Былтыр улар 18 ине.

«Был уҡыусыларҙың тырышлығы һәм маҡсатҡа ынтылышы, шулай уҡ уҡытыусыларыбыҙҙың ғәйәт ҙур хеҙмәте хаҡында һөйләй, — тип билдәләне Урал Килсенбаев. — Быйыл 2423 сығарылыш уҡыусыһы химиянан берҙәм дәүләт имтиханы тапшырҙы, уларҙың 630-ы 81 һәм унан юғарыраҡ балл йыйҙы. Республика етәксеһе тәҡдиме менән БДИ һөҙөмтәләре буйынса 100 балл йыйған уҡыусылар әҙерләгән уҡытыусыларға — 50 мең, ә максималь балл туплап, республиканың юғары уҡыу йорттарына ингән йәштәргә 150 мең һум күләмендә премия түләнә. Мәктәп тамамлаусыларҙы һәм уларҙың уҡытыусыларын юғары һөҙөмтәләр менән ҡотлайым. Уҡыусыларыбыҙҙың уңыштары менән ғорурланабыҙ! Афарин!»

https://www.bashinform.ru/news/social/2024-06-05/v-bashkirii-prishli-pervye-rezultaty-ege-po-geografii-himii-i-literature-3798329