Башҡортостан Башлығы Стратегик башланғыстар агентлығынан йәшәү сифаты рейтингын күтәрергә ҡушты

Хөкүмәттең аҙналыҡ оператив кәңәшмәһендә Башҡортостан Башлығы 2023 йыл өсөн Стратегик башланғыстар агентлығы версияһы буйынса йәшәү сифаты рейтингы мәғлүмәттәренә үҙ фекерен белдерҙе. Иҫегеҙгә төшөрәбеҙ, Башҡортостан тәүге тапҡыр алдынғы төбәктәр иҫәбенә инде, исемлектә республикабыҙ 12-се урынды биләй. 2021 йылда беҙ – 40-сы, 2022 йылда иһә 25-се урында инек.

«Башҡортостан Республикаһы беренселәй Рәсәйҙең тәүге 20 төбәге иҫәбенә инде һәм 12-се урынды алды. Рейтингта Рәсәйҙең барлыҡ 89 субъекты ла баһаланғанын иҫәпкә алғанда, был яҡшы. Экологик именлек, һаулыҡ һаҡлау, мәғариф күрһәткестәре, ғаиләләргә ярҙам итеү, таҙалыҡ, хәүефһеҙлек, йәғни мөһим интеграль күрһәткестәр иҫәпкә алынған.

Агентлыҡ рейтингты халыҡтың фекеренә таянып төҙөгән. Беҙ еңеп сығырға өйрәнгәнбеҙ, 12-се урын – яҡшы һөҙөмтә, ләкин юғарыға ынтылырға кәрәк», – тип билдәләне Радий Хәбиров.

https://www.bashinform.ru/news/social/2024-06-03/glava-bashkirii-poruchil-povyshat-reyting-kachestva-zhizni-ot-asi-3795797