Радий Хәбиров алданған өлөшсөләр проблемаларын хәл иткән өсөн дәүләт наградалары тапшырҙы

Бөгөн, 14 майҙа, Өфөлә Башҡортостан Башлығы Радий Хәбиров республикала төҙөлөштә өлөшләтә ҡатнашып зыян күргән граждандарҙың хоҡуҡтарын тергеҙеүҙә әүҙем ҡатнашҡан власть органдары, хоҡуҡ һаҡлау органдары вәкилдәренә һәм төҙөүселәргә республиканың дәүләт наградаларын тапшырҙы. Был эш 2023 йылда уңышлы тамамланды.

2017 йылда ошо эште башлағанда республикала 170 проблемалы объект бар ине, тип иҫкә төшөрҙө Радий Хәбиров. Йылдар буйына хәл ителмәгән мәсьәлә күп ғаиләләр өсөн бик ауыр тема булды.

«Оло тырышлыҡ һәм ныҡышмалы системалы эш менән шундай һөҙөмтәгә өлгәштек. 15 меңгә яҡын кешенең хоҡуҡтарын тергеҙҙек. Йәмғеһе 98 йортто төҙөп бөттөк. Илдең барлыҡ төбәктәре лә был проблеманы хәл итмәгән әле. Беҙгә ҡатмарлы ҡарарҙар ҡабул итергә тура килде. Хоҡуҡ һаҡлау органдары мөһим роль уйнаны, улар намыҫһыҙ төҙөүселәрҙе енәйәт яуаплылығына тарттырыу йәһәтенән ҙур эш башҡарҙы. Йәмәғәт структураларына ла рәхмәт белдерәм», — тине Радий Хәбиров.

Алданған өлөшсөләрҙең хоҡуҡтарын тергеҙеү эше ил президенты ҡушыуы буйынса алып барылды, тип билдәләне республика етәксеһе.

Биләмәләрҙе үҫтереү фонды булышлығында 2020 йылдан 4300-ҙән ашыу кеше 12,2 миллиард һумдан күберәк  компенсация алған. 27 йорт төҙөлөшөн тамамлау өсөн 9,4 миллиард, шул иҫәптән республиканан 1,1 миллиард һум аҡса йүнәлтелгән. 1,5 меңгә яҡын кеше фатирлы булған.

Радий Хәбиров шулай уҡ хөкүмәт премьер-министры урынбаҫары Алан Марзаевҡа, төҙөлөш һәм архитектура министры вазифаһын башҡарыусы Артем Ковшовҡа алданған өлөшсөләрҙең проблемаларын хәл итеүҙә әүҙем ҡатнашҡаны өсөн рәхмәт белдерҙе.

https://www.bashinform.ru/news/social/2024-05-14/radiy-habirov-vruchil-gosnagrady-za-reshenie-problem-obmanutyh-dolschikov-3764784