Башҡортостанда 124 Бөйөк Ватан һуғышында ҡатнашыусы йәшәй

Республиканың Хәрби Дан музейы етәксеһе урынбаҫары Лилиә Нурасова Республика менән идара итеү үҙәгенән Башҡортостан юлдаш телеканалының «Сәләм» тапшырыуы тура эфирында бөгөн төбәктә 124 Бөйөк Ватан һуғышында ҡатнашыусы йәшәүен әйтте.

Уның һүҙҙәренсә, 200 мең яугир орден-миҙалдар (шул иҫәптән Миңлеғәле Шайморатовтың легендар 112-се Башҡорт кавалерия дивизияһының 3860 яугире) менән бүләкләнгән, 299 кеше — Советтар Союзы Геройы, ә 47-һе Дан орденының тулы кавалеры исеменә лайыҡ булған.

«Республикала йәшәүселәр фронтта ғына түгел, тылда ла ҡаһарманлыҡ күрһәткән. Алты яҡташыбыҙ фиҙакәр хеҙмәте өсөн Социалистик Хеҙмәт Геройы исемен алған», — тип билдәләне эфир ҡунағы.

Башҡортостандан 710 мең кеше фронтҡа киткән, уларҙың 322 меңе әйләнеп ҡайтмаған.

https://www.bashinform.ru/news/social/2024-05-08/v-bashkirii-prozhivayut-124-uchastnika-velikoy-otechestvennoy-voyny-3759000