Иҫке Сибайға Радий Хәбиров вәғәҙә иткән хоккей ҡумтаһын алып ҡайтҡандар

Баймаҡ районының Иҫке Сибай ауылында хоккей ҡумтаһы барлыҡҡа киләсәк. Был хаҡта Сибай Утарбаевтың социаль селтәрҙәге яҙмаһына һылтанма менән «Баймаҡ хәбәрҙәре» гәзите яҙа.

Башҡортостан Башлығы Радий Хәбировтың Баймаҡ районына эш сәфәре барышында уҡытыусылар һәм ата-әсәләр республика етәксеһенән заманса хоккей ҡумтаһы һораны, тип хәбәр иткәйне «Башинформ» мәғлүмәт агентлығы. Радий Хәбиров республиканың Спорт министрлығына ошо мәсьәлә менән шөғөлләнергә ҡушты.

Оҙайлы май байрамдарында барлыҡ ҡорамалдарҙы өс прицеп таҡҡан «КамАЗ»дар менән Нефтекама ҡалаһынан тейәп алып ҡайтҡандар.

Хәтерегеҙгә төшөрәбеҙ, 2023 йылда Иҫке Сибайҙа «Мәғариф» милли проекты сиктәрендә төҙөлгән 375 уҡыусы өсөн яңы мәктәп асылды. Белем биреү учреждениеһы биләмәһендә хәрәкәтле уйындар өсөн — өс, тыныс ял өсөн ике майҙансыҡ урынлашҡан. Физкультура-спорт зонаһында ике баскетбол, волейбол һәм еңел атлетика майҙансыҡтары, футбол майҙаны бар.

https://www.bashinform.ru/news/social/2024-05-03/v-selo-bashkirii-privezli-obeschannuyu-radiem-habirovym-hokkeynuyu-korobku-3751480