Башҡортостан яугирҙәре Донецк Халыҡ Республикаһында мәсет төҙөй

Салауат Юлаев исемендәге башҡорт ирекле батальоны яугирҙәре Донецк Халыҡ Республикаһында мәсет төҙөй. Хәрбиҙәрҙең башланғысы тураһында «Башинформ» мәғлүмәт агентлығына Башҡортостан Башлығының Рәсәй милли гвардияһы ғәскәрҙәре менән үҙ-ара эш итеү буйынса кәңәшсеһе Артур Йомағужин хәбәр итте.

Командирҙың «Амин» позывнойлы сәйәси эштәр буйынса урынбаҫары, батальон имамы әйтеүенсә, яугирҙәр махсус хәрби операция зонаһында урындағы мәсеттәргә иркенләп йөрөй алмай. Шуға күрә үҙҙәренә мәсет төҙөргә тигән ҡарарға килгән.

«Беҙ — мосолман республикаһы яугирҙәре. Әммә беҙҙең Донбасс мәсетенә инергә мөмкинлегебеҙ юҡ. Шуға үҙебеҙҙекен төҙөргә булдыҡ. Хәрбиҙәр төҙөлөшкә ыңғай ҡарашта, ваҡыттары булһа, улар ҙа ошо эштә бик әүҙем ҡатнаша»,  — тине «Амин».

Башҡорт яугирҙәренең башланғысы урындағы халыҡты дәртләндерҙе, тип билдәләне Артур Йомағужин. Уларҙың күптәре изге ғәмәлгә ҡушылған. Мәсетте 16 июндә — Ҡорбан байрамында асыу көтөлә.

«Донбаста ла мосолмандар йәшәй, улар беҙҙең башлаған эште хуплай. Урындағы халыҡтың тыныс төҙөлөштө ҡыуанып ҡабул итеүен күреүе бик күңелле булды. Беҙгә урындағы дин әһелдәре килә. Улар имамыбыҙ һәм христиандарҙың дин әһеле менән тығыҙ аралаша. Бер-береһе менән мәсетте нисегерәк һалыу тураһында кәңәшләшәләр. Шул рәүешле беҙ Башҡортостанда ғына түгел, яугирҙәребеҙ хеҙмәт иткән махсус хәрби операция зонаһында ла мосолмандар менән христиандарҙың үҙ-ара дуҫ йәшәүенә тағы бер тапҡыр инанабыҙ», - тип билдәләне Артур Йомағужин.

Республика етәксеһе Радий Хәбиров менән килешеү буйынса Башҡортостандан ҡарағай бүрәнәләре, таҡталар һәм бурсалар килтерелгән. Шулай уҡ республикабыҙҙың төҙөлөш материалы Донецк Халыҡ Республикаһында Табыныу өсөн тәре төҙөүҙә ҡулланылған. Уны «юлаевсылар» мәсет урынынан 300 метр алыҫлыҡта ҡуйған.

https://www.bashinform.ru/news/svo/2024-05-03/voiny-iz-bashkirii-ustanovili-v-dnr-poklonnyy-krest-i-stroyat-mechet-3751960