Өфөлә «Айыҡ ауыл» республика конкурсы еңеүселәре бүләкләнде

25 апрелдә Өфөнөң «Торатау» конгресс-холында «Айыҡ ауыл» республика конкурсы еңеүселәрен бүләкләнеләр. Хәтерегеҙгә төшөрәбеҙ, ул 2019 йылда Бөтә донъя башҡорттары ҡоролтайы башланғысы менән ҡабаттан тергеҙелде. Ошо осорҙа 39 ауыл еңеүсе булды. 2019 йылдан алып унда бөтәһе 3 меңдән ашыу ауыл, 30 меңгә яҡын әүҙемсе һәм меңдән күберәк ирекмән ҡатнашҡан. Конкурстың төп маҡсаты – айыҡ һәм сәләмәт йәшәү рәүешен популярлаштырыу, халыҡты йәмәғәт эшмәкәрлегенә ылыҡтырыу, яҡшы  ғәмәлдәргә рухландырыу.

Йылдан-йыл конкурс популярлыҡ яулай бара. Башҡортостан тәжрибәһе менән күрше төбәктәр: Удмурт Республикаһы, Татарстан, Яҡутстан, Һарытау, Свердловск, Ырымбур, Силәбе өлкәләре, Пермь крайы ла ныҡ ҡыҙыҡһына.

Конкурс Башҡортостан Республикаһы Башлығы гранты иҫәбенә һәм төбәк хөкүмәте булышлығында тормошҡа ашырыла.

Рәсәй Дәүләт Думаһы депутаты, Бөтә донъя башҡорттары ҡоролтайы президиумы рәйесе Эльвира Айытҡолова һүҙҙәренсә, конкурстың төп һөҙөмтәһе – ауылдарҙағы ыңғай күренештәр. Конкурста ҡатнашыу һәм еңеү ауыл халҡының йәшәү рәүешен үҙгәртә, уларҙың мәҙәни сараларға, спортҡа ҡыҙыҡһыныуы арта, алкоголгә тартылыу кәмей. Ә иң мөһиме – халыҡ дуҫыраҡ йәшәй башлай.

2024 йылда «Айыҡ ауыл» республика конкурсы еңеүселәре:

«Эре тораҡ пункттар» номинацияһында:

I урын – Бөрйән районы, Байназар ауылы;
II урын – Иглин районы, Ҡалтыман ауылы;
III урын – Учалы районы, Сәфәр ауылы.

«Ҙур тораҡ пункттар» номинацияһында:

I урын – Йәрмәкәй районы, Әбделкәрим ауылы;
II урын – Салауат районы, Әлкә ауылы;
III урын – Яңауыл районы, Байғужа ауылы.

«Урта тораҡ пункттар»номинацияһында:

I урын – Хәйбулла районы, Оло Әбеш ауылы;
II урын – Ауырғазы районы, Степановка ауылы;
III урын – Тәтешле районы, Сорғолды ауылы.

«Бәләкәй тораҡ пункттар»номинацияһында:

I урын – Асҡын районы, Төлгөҙбаш ауылы;
II урын – Саҡмағош районы, Иҫке Ихсан ауылы;
III урын – Стәрлебаш районы, Түбәнге Аллағыуат ауылы.

Алты миллион күләмендәге приз «Ҙур тораҡ пункттар» номинацияһы еңеүсеһенә тапшырыла. Башҡа номинацияларҙа еңеүселәргә иһә 5, 4 һәм 3 миллион һум аҡса, бүләктең суммаһы ауылдың ҙурлығына ҡарап билдәләнә.

https://www.bashinform.ru/news/social/2024-04-25/v-ufe-nagradili-pobediteley-respublikanskogo-konkursa-trezvoe-selo-3742888